စစ်အာဏာရှင်စနစ် အမြစ်ပြတ်ချေမှုန်းရေးတွင် ပအိုဝ်းပြည်သူများ ပါဝင်ကြရန် PNFC တိုက်တွန်း

စစ်အာဏာရှင်စနစ်ကို အမြစ်ပြတ်ချေမှုန်းရေးအပါအဝင် ဖက်ဒရယ်ဒီမိုကရေစီ ပြည်ထောင်စု တည်ဆောက်ရေး၊ ပအိုဝ်းအမျိုးသားလွတ်‌မြောက်ရေးတိုက်ပွဲတွင် ပအိုဝ်း ပြည်သူများ အနေဖြင့် ၎င်းတို့နှင့် လက်တွဲ၍ တိုက်ပွဲဝင်ကြရန် ပန်ကြားကြောင်း PNFC က ထုတ်ပြန်သည်။

.

(၇၃) နှစ်မြောက် ပဒေသရာဇ်စနစ်ဆိုး ဆန့်ကျင်တော်လှန်ရေးနေ့ အထိမ်းအမှတ် အဖြစ် ယမန်နေ့ ဒီဇင်ဘာလ ၁၁ ရက်တွင် ထုတ်ပြန်သည့် ပအိုဝ်းအမျိုးသားဖက်ဒရယ်ကောင်စီ (PNFC)၏ ကြေညာချက်တွင် ယင်းကဲ့သို့ ဖော်ပြထားခြင်း ဖြစ်သည်။

.

လက်နက်ကိုင်လမ်းစဉ်ဖြင့် ပဒေသရာဇ်စနစ်ကို ၁၉၄၉ ခုနှစ် ဒီဇင်ဘာလ ၁၁ ရက်တွင် ဆန့်ကျင်ခဲ့ဆသော်လည်း ၁၉၆၂ ခုနှစ်က စပြီး ပအိုဝ်း အပါအဝင် ပြည်သူလူထု တစ်ရပ်လုံး ပိုမို ဆိုးရွားသည့် စစ်အာဏာရှင်စနစ်နှင့် ကြုံတွေ့ခဲ့ရခြင်း ဖြစ်သည်ဟု ထုတ်ပြန်ချက်တွင် ဖော်ပြထားသည်။

. 

လက်ရှိနွေဦးတော်လှန်ရေးသည် စုပေါင်းအားဖြင့် စစ်အာဏာရှင်စနစ် ဖျက်သိမ်းရေးနှင့် ဖက်ဒရယ် ပြည်ထောင်စု တည်ဆောက်ရေးတို့တွင် အလားအလာကောင်းများ တွေ့ရှိနေရသည်ဟုလည်း ဆိုသည်။

.

PNFC ကို ၂၀၂၁ ခုနှစ်၊ ဒီဇင်ဘာလ ၁၁ ရက်က ပြုလုပ်သည့် ၇၂ နှစ်မြောက် ပအိုဝ်းအမျိုးသားလွတ်မြောက်မှုတော်လှန်ရေးနေ့တွင် ပအိုဝ်းတော်လှန်ရေးအင်အားစုများ ပူးပေါင်းကျင်းပသည့် ပအိုဝ်းအမျိုးသားဖက်ဒရယ်ညီလာခံက တဆင့် ဖွဲ့စည်းခဲ့ခြင်း ဖြစ်သည်။