.
Burma Act ပါဝင်သည့်
အမေရိကန်အမျိုးသားကာကွယ်ရေးဥပဒေ (NDAA)ကို အမေရိကန်လွှတ်တော် ၂ ရပ်တွင် အတည်ပြုလိုက်သည့်အပေါ် ကျေးဇူးတင်ကြောင်း အမျိုးသားညီညွတ်ရေးအစိုးရ၊
ယာယီသမ္မတ ဒူဝါလရှီးလက ယနေ့ ဒီဇင်ဘာလ ၁၆ ရက်တွင် သဝဏ်လွှာပေးပို့ခဲ့သည်ဟု သိရသည်။
.
အဆိုပါ Burma Act သည် မြန်မာနိုင်ငံတွင် ရုန်းကန်နေရသည့်
ပြည်သူများစွာအတွက် လိုအပ်နေသည့် မျှော်လင့်ချက် နှင့် အထောက်အပံ့များ ပေးစွမ်းနိုင်မည်ဖြစ်ကြောင်း
ယာယီသမ္မတက သဝဏ်လွှာတွင် ဖော်ပြထားသည်။
.
NDAA ဥပဒေကြမ်းကို
အမေရိကန် အောက်လွှတ်တော်က အတည်ပြုအပြီး ၈ ရက်အကြာတွင် အထက်လွှတ်တော်က
ထပ်မံအတည်ပြုခဲ့သဖြင့် သမ္မတဘိုင်ဒန် လက်မှတ်ရေးထိုးရန်သာ ကျန်ရှိကြောင်း သိရသည်။
.
အမေရိကန်သမ္မတ ဘိုင်ဒန်အနေဖြင့်လည်း
ယင်းဥပဒေကြမ်းကို ဥပဒေတစ်ရပ်အဖြစ် မကြာမီ အတည်ပြုလက်မှတ် ရေးထိုးမည်ဟု မျှော်လင့်ကြောင်း
ယာယီသမ္မတဒူဝါလရှီးလက ဆိုသည်။
.
စာမျက်နှာ ၄၄၀၈ မျက်နှာ
ပါဝင်သည့် ယင်း NDAA ဥပဒေကြမ်းတွင်
မြန်မာ့အရေးပြဌာန်းချက် ၂၅ မျက်နှာ ပါဝင်ပြီး မြန်မာ့ဒီမိုကရေစီအရေးအတွက်
အရေးပါပြီး ဒီမိုကရေစီရေး၊ လူ့အခွင့်အရေးနှင့် တရားမျှတမှုအတွက် စစ်ကောင်စီကို
ဆန့်ကျင်နေသည့် NUG၊ NUCC၊ CRPH၊ CDM နှင့် မိတ်ဖက်အဖွဲ့အစည်းများ အားလုံး၏ ရုန်းကန်မှုအတွက် အမေရိကန်၏
ကူညီထောက်ပံ့ရေး မူဝါဒကို ထည့်သွင်းထားသည်ဟု သိရသည်။
.
ထို့အပြင် မြန်မာနိုင်ငံတွင်းရှိ
လူမျိုးစုလက်နက်ကိုင်အဖွဲ့အစည်းများ၊ ပြည်သူ့ကာကွယ်ရေးတပ်ဖွဲ့ (PDF) များ၊ ဒီမိုကရေစီရေး လှုပ်ရှားသည့်အဖွဲ့အစည်းများအနေဖြင့်
၎င်းတို့ကြားတွင်သော်လည်းကောင်း၊ နိုင်ငံတကာ အကူအညီပေးရေးလုပ်ငန်းများတွင်သော်လည်းကောင်း
ဆက်သွယ်ရေး၊ အမိန့်ပေးထိန်းချုပ်ကွပ်ကဲမှုနှင့် ပူးပေါင်း ဆောင်ရွက်မှုများ
ပိုမိုအားကောင်းခိုင်မာလာစေရန် နည်းပညာနှင့် လက်နက်မဟုတ်သော အထောက်အပံ့များပေးရန် စသည့်အချက်များကို
ထည့်သွင်းပြဌာန်းထားသည်။
.
အဆိုပါ အကူအညီများကို
၂၀၂၃ ခုနှစ်မှ ၂၀၂၇ ခု ဘဏ္ဍာရေးနှစ်အထိ နှစ်အလိုက် ဆောင်ရွက်သွားမည်ဖြစ်ကြောင်း သိရသည်။
.
