.
ကရင်နီ (ကယား) ပြည်နယ်၊
လွိုင်ကော်မြို့တွင် ပြီးခဲ့သည့် နိုဝင်ဘာလ နောက်ဆုံးပတ်အတွင်း စစ်ကောင်စီတပ်နှင့်
KNDF ပူးပေါင်းတပ်များအကြား
၅ ရက်တာ တိုက်ပွဲဖြစ်ပွားခဲ့ပြီး စစ်ကောင်စီဘက်မှ ၅ ဦးထက်မနည်း သေဆုံးခဲ့ ကြောင်း ကရင်နီအမျိုးသားများကာကွယ်ရေးတပ်၊
တပ်ရင်း (၂) (KNDF-B02) က ယမန်နေ့ ဒီဇင်ဘာလ ၄ ရက်တွင် ထုတ်ပြန်ထားသည်။
.
လွိုင်ကော်မြို့နယ်၊
ပါလောင်းကျေးရွာ ဆေးခန်းနှင့် ဘုန်းကြီးကျောင်းတွင် တပ်စွဲထားသော စစ်ကောင်စီတပ် အင်အား
၁၀၀ ခန့်ကို နိုဝင်ဘာလ ၂၄ ရက်က KNDF ပူးပေါင်းတပ်များမှ သွားရောက်ပစ်ခတ်ခဲ့ရာ တစ်နေကုန်နီးပါး တိုက်ပွဲ ဖြစ်ပွားခဲ့ပြီး
စစ်ကောင်စီတပ်ဘက်မှ အထိနာကာ ပါလောင်းရွာပြင် အစပ်သို့ ပြောင်းရွှေ့တပ်ဆုတ်သွားခဲ့ကြောင်း
သိရသည်။
.
တိုက်ပွဲတွင် ပူးပေါင်းတပ်များမှ
ထိခိုက်မှုမရှိခဲ့ဘဲ တိုက်ပွဲဖြစ်ပွားနေချိန်အတွင်း ပါလောင်းကျေးရွာ လမ်းမပေါ်တွင်
ဆိုင်ကယ်ဖြင့် ဖြတ်သန်းမောင်းနှင်ခဲ့သည့် ဆူးဖဲလောကျေးရွာနေ ပြည်သူတစ်ဦးကို စစ်ကောင်စီတပ်က
ပစ်ခတ် သတ်ဖြတ်ခဲ့ကြောင်း သိရသည်။
.
ထို့နောက် နိုဝင်ဘာလ
၂၅ ရက်တွင် ပါလောင်းကျေးရွာပြင် အစပ်ရှိ လူနေအိမ်မျးအတွင်း နေရာပြောင်းရွှေ့ တပ်စွဲ
ထားသော စစ်ကောင်စီတပ်ကို ပူးပေါင်းတပ်များက ထပ်မံတိုက်ခိုက်ခဲ့ရာ စစ်ကောင်စီတပ်ဘက်မှ
ထိခိုက်သေဆုံးမှုများ ရှိနိုင်ပြီး အတည်မပြုနိုင်သေးကြောင်း ထုတ်ပြန်ချက်တွင် ဖော်ပြထားသည်။
.
အဆိုပါတိုက်ပွဲတွင်
စစ်ကောင်စီ၏ လွိုင်ကော်အခြေစိုက် ခလရ (၂၅၀) မှ လက်နက်ကြီးပစ်ကူ ၁၅ ကြိမ်ထက်မနည်း ပစ်ကူပေးခဲ့ပြီး
ရွာအတွင်းရှိ လူနေအိမ်အများအပြား ထိခိုက်ပျက်စီးခဲ့ကြောင်း သိရသည်။
.
ပါလောင်းရွာအရှေ့ဘက်ရှိ
ဒေါတယို့ရွာသစ်နှင့်ရွာဟောင်းကြားတွင် ထပ်မံပြောင်းရွေ့ တပ်စွဲထားသော စစ်ကောင်စီ တပ်ကို
တပ်ပေါင်းစုများက နိုဝင်ဘာလ ၂၆ ရက်၊ နံနက်ပိုင်းတွင်သွားရောက်ပစ်ခတ်ခဲ့ရာ ၁ နာရီခန့်
ထိတွေ့တိုက်ပွဲ ဖြစ်ပွားခဲ့ပြီး KNDF ပူးပေါင်းတပ်များမှ ရဲဘော် ၃ ဦး ထိခိုက်ဒဏ်ရာ (မစိုးရိမ်ရ) ရရှိခဲ့ကြောင်း
သိရသည်။
.
ယင်းနေ့တွင်ပင် ပူးပေါင်းတပ်များက
ပါလောင်းကျေးရွာအတွင်း နယ်မြေရှင်းလင်းရေး ပြုလုပ်စဉ် နိုဝင်ဘာလ ၂၄ ရက်က စစ်ကောင်စီတပ်၏
ပစ်ခတ်မှုကြောင့် သေဆုံးခဲ့သည့် ပြည်သူရုပ်အလောင်းကို မြှုပ်နှံပေးခဲ့ကြောင်း သိရသည်။
.
KNDF ပူးပေါင်းတပ်များသည်
နိုဝင်ဘာလ ၂၇ ရက်တွင် လွိုင်ကော်မြို့နယ်၊ ဒေါ့တယို့ကျေးရွာအနီးပတ်ဝန်းကျင်၌ နယ်မြေရှင်းလင်းရေး
ဆောင်ရွက်နေစဉ်ဒေ့ါတယို့ရွာသစ်နှင့် ရွာဟောင်းအကြားတွင် စစ်ကောင်စီတပ်နှင့် အပြန်အလှန်
ပစ်ခတ်တိုက်ခိုက်မှုဖြစ်ပွားခဲ့ရာ တိုက်ပွဲဖြစ်ပွားချိန် ၄ နာရီခန့် ကြာမြင့်ခဲ့ပြီး
KNDF ပူးပေါင်းတပ်မှ ရဲဘော်တစ်ဦး မစိုးရိမ်ရဒဏ်ရာ ရရှိကာ စစ်ကောင်စီတပ်တွင်လည်း
ထိခိုက်သေဆုံးမှုများ ရှိခဲ့ကြောင်း သိရသည်။
.
တိုက်ပွဲဖြစ်ပွားနေစဉ်အတွင်း
လွိုင်ကော်အခြေစိုက် စစ်ကောင်စီတပ်စခန်းမှ လက်နက်ကြီး ၅ ကြိမ်ထက်မနည်း ပစ်ကူ ပေးခဲ့ကြောင်း
သိရသည်။
.
အလားတူ နိုဝင်ဘာလ
၂၉ ရက်က ပါလောင်းရွာ အနောက်ဘက်တောင်ပေါ်၌ နေရာယူထားသော စစ်ကောင်စီတပ်နှင့် KNDF တပ်ပေါင်းစုတို့ ထိတွေ့ရင်ဆိုင်
တိုက်ပွဲဖြစ်ပွားခဲ့ရာ တပ်ပေါင်းစုမှ ရဲဘော်တစ်ဦး ထိခိုက်ဒဏ်ရာရရှိခဲ့ပြီး စစ်ကောင်စီတပ်သား
၂ ဦး သေဆုံးသည်ကို အတည်ပြုနိုင်ခဲ့ကြောင်း ထုတ်ပြန်ချက်တွင် ဖော်ပြထားသည်။
.
စစ်ကောင်စီတပ်၏ ရိက္ခာပို့လမ်းကြောင်းပေါ်
တွင်ရှိနေသော ပါလောင်းကျေးရွာနှင့် ဒေါတယို့ကျေးရွာတို့တွင် တိုက်ပွဲ
အချိန်မရွေးဖြစ်ပွားနိုင်သောကြောင့် ကျေးရွာနေပြည်သူအများအပြား အိုးအိမ်စွန်ခွာ
စစ်ဘေးရှောင်နေရဆဲဖြစ်ကြောင်း KNDF-B02
က ထုတ်ပြန်ထားသည်။
.
