ဒီးမော့ဆိုတွင် စစ်ကြောင်းထိုးလာသော စစ်ကောင်စီတပ်ကို KNDF ပူးပေါင်းတပ်များမှ တိုက်ခိုက်ရာ စစ်ကောင်စီ ဘက်မှ ၂၀ ကျော် သေဆုံးပြီး ၄ ဦး အရှင်ဖမ်းမိ

.

ကရင်နီ၊ ကယားပြည်နယ်တွင် ယမန်နေ့ ဒီဇင်ဘာလ ၃ ရက်က စစ်ကြောင်းထိုးလာသော စစ်ကောင်စီတပ် စစ်ကြောင်း ကို KNDF ပူးပေါင်းတပ်များမှ တိုက်ခိုက်ခဲ့ရာ  စစ်ကောင်စီဘက်မှ ၂၀ ကျော် သေဆုံးကာ ၄ ဦးကို အရှင်ဖမ်းမိခဲ့ကြောင်း KNDF က ထုတ်ပြန်ထားသည်။

.

.

ဒီးမော့ဆိုမြို့နယ်၊ ‌ဒေါကမီးကျေးရွာဘက်သို့ ယမန်နေ့ ဒီဇင်ဘာလ ၃ ရက်၊ နံနက်ပိုင်းက အင်အားအလုံးအရင်းဖြင့် စစ်ကြောင်းထိုးလာသော စစ်ကောင်စီတပ်များကို KNDF B (01)၊ B (05)၊ B (06)၊ B (07) ၊ B (09) နှင့် KA တို့ ပူးပေါင်း၍ တိုက်ခိုက်ခဲ့ရာ တစ်နေကုန်နီးပါး ထိတွေ့တိုက်ပွဲများ ဖြစ်ပွားခဲ့ခြင်းဖြစ်ကြောင်း သိရသည်။

.

ထိတွေ့တိုက်ပွဲအတွင်း ဒီးမော့ဆိုအခြေစိုက် စစ်ကောင်စီတပ်များမှ လက်နက်ကြီးများဖြင့် အဆမတန် ပစ်ကူပေးခဲ့ သည့်အပြင် ညနေပိုင်းတွင် တိုက်လေယာဥ်ဖြင့် ၃ ကြိမ် လာရောက် ဗုံးကြဲတိုက်ခိုက်ခဲ့ပြီး ည ၉ နာရီခန့်တွင်လည်း တိုက်လေယာဉ်ဖြင့် ထပ်မံ၍ လာရောက်ဗုံးကြဲတိုက်ခိုက်ခဲ့ကြောင်း သိရသည်။

.

အဆိုပါ ထိတွေ့တိူက်ပွဲများအတွင်း စစ်ကောင်စီဘက်မှ ၂၀ ကျော် သေဆုံးပြီး တပ်ကြပ်ကြီး ၁ ဦး၊ တပ်ကြပ် ၂ ဦးနှင့် တပ်သား ၁ ဦးတို့အား အရှင်ဖမ်းဆီးရမိကာ MA-1 သေနတ် ၄ လက်၊ MA -3 သေနတ် ၂ လက်၊ MA-4 (79)တွဲ ၁ လက်၊ MG-3 အမျိုးအစား ငါကြင်းမြီး ၁ လက်၊ RPG ၁ လက်၊ (၆၀) မမ စိန်ပြောင်း ၂ ပြောင်း၊  ကွန်ပျူတာ ၁ လုံး၊ ဖုန်းများနှင့်  ခဲယမ်းပစ္စည်းများ၊ အသုံးအဆောင်အချို့တို့အား သိမ်းဆည်းရမိခဲ့ကြောင်း KNDF ၏ ထုတ်ပြန်ချက်တွင် ဖော်ပြထား သည်။

.

စစ်ကောင်စီဖက်မှ စစ်ကြောင်းထိုးလာသောတပ်ရင်းမှာ တပ်မ(၆၆) လက်အောက်ခံ ဓနုဖြူ အခြေစိုက် ခမရ (၁၀၈) တပ်ရင်းဖြစ်ပြီး အဆိုပါ တပ်ရင်းမှာ ၂၀၂၁ ခုနှစ်၊ ဒီဇင်ဘာလ ၂၄ ရက်နေ့က ဖရူဆိုမြို့နယ်၊ မိုဆိုကျေးရွာအနီးတွင် အပြစ်မဲ့ပြည်သူ ၄၀ ကျော်အား မီးရှို့သတ်ဖြတ်ခဲ့သည့် စစ်ရာဇဝတ်မှုကျူးလွန်ရာတွင် ပါဝင်ခဲ့သော တပ်ရင်းဖြစ် ကြောင်း KNDF က အသိပေးထားသည်။

.

လက်ရှိတွင် ဒီးမော့ဆိုမြို့နယ်၊ ကုန်းသာကျေးရွာ အရှေ့ဘက်၊ သေးဆူလဲ၊ ဒေါကမီးကျေးရွာ အနီးဝန်းကျင်တို့တွင် စစ်ကောင်စီတပ် စစ်ကြောင်းများ ပြန်ထိုးလာနေသဖြင့် စစ်ရေးတင်မာနေပြီး တိုက်ပွဲများလည်း ဖြစ်ပွားနေသဖြင့် ပြည်သူများအနေဖြင့် ယင်းနေရာများသို့ ဖြတ်သန်းသွားလာခြင်း၊ နေအိမ်ပြန်ခြင်းများ မပြုကြရန် KNDF က မေတ္တာ ရပ်ခံထားသည်။

.