ဖရူဆိုမြို့ရှိ စစ်ကောင်စီ၏ အမှတ် (၁၄) တန်းမြင့်စစ်လေ့ကျင်ရေးကျောင်း လုံခြုံရေးစခန်းကုန်းကို KA နှင့် ပူးပေါင်းတပ်ဖွဲ့များ ဝင်တိုက်

.

ကရင်နီ (ကယား) ပြည်နယ်၊ ဖရူဆိုမြို့ တောင်ဘက်ခြမ်းရှိ စစ်ကောင်စီတပ်၏ အမှတ် (၁၄) တန်းမြင့်စစ်လေ့ကျင့်ရေး ကျောင်း၏ အထူးလုံခြုံရေးစခန်းဖြစ်သော မာခရော်ရှေ့စခန်းကို ဒီဇင်ဘာလ ပထမပတ်အတွင်းက ကရင်နီတပ်မတော် (KA) နှင့် ပူးပေါင်းတပ်များက ဝင်ရောက်တိုက်ခိုက်ခဲ့ကြောင်း KA က ယနေ့ ဒီဇင်ဘာလ ၁၇ ရက်တွင် ထုတ်ပြန် ထားသည်။

.

.

အဆိုပါ တိုက်ခိုက်မှုအတွင်း စစ်ကောင်စီဘက်မှ အနည်းဆုံး ၇ ဦး သေဆုံးပြီး အများအပြား ထိခိုက်ဒဏ်ရာ ရရှိခဲ့ ကြောင်း KA ၏ ထုတ်ပြန်ချက်တွင် ဖော်ပြထားသည်။

.

၎င်းစစ်လေ့ကျင့်ရေးကျောင်း တည်ဆောက်နိုင်ရေးအတွက် မာခရော်ရှေ့၊ လောဂျာ၊ ဒေါလော့ခူ စသည့် ကျေးရွားများမှ  ပြည်သူပိုင် ခြံမြေ ဧက ၂၇၀၀ ကျော်ကို ၂၀၁၀ ပြည့်နှစ်တွင် စတင်သိမ်းယူခဲ့ခြင်းဖြစ်ကြောင်း သိရသည်။

.

အဆိုပါ စစ်ရေးလေ့ကျင့်ရေးကျောင်းနှင့် ပတ်သက်၍ ၂၀၁၂ ခုနှစ်တွင် KNPP က ကန့်ကွက်ဆွေးနွေးခဲ့ပြီး စစ်လေ့ကျင့်ရေးကျောင်းအစား ​ဒေသခံများအတွက် တက္ကသိုလ်အဖြစ် ပြောင်းလဲအသုံးပြုရန် တင်ပြခဲ့သော်လည်း စစ်ကောင်စီတပ်က သဘောမတူဘဲ ယနေ့တိုင် စစ်ရေးလေ့ကျင့်ရေးကျောင်းအဖြစ် ဆက်လက်အသုံးပြုနေခြင်း ဖြစ်ကြောင်း သိရသည်။

.

ယင်း စစ်ရေးလေ့ကျင့်ရေးကျောင်းမှ နေ့စဉ်ရက်ဆက်ဆိုသလို အမြောက်လက်နက်ကြီးများ ပစ်ခတ်မှုကြောင့် ဒေသခံ အချို့ ထိခိုက်မှုများရှိပြီး တောင်ယာလုပ်ကိုင်စားသောက်ရန် အခက်အခဲများ ရှိနေကြောင်း သိရသည်။

.