ဒီးမော့ဆိုမြို့နယ်တွင် စခန်းများစွန့်လွှတ်ခဲ့ရသည့် စစ်ကောင်စီတပ်က အင်အားအလုံးအရင်းဖြင့် စစ်ကြောင်းထိုးလာပြီး တိုက်ပွဲ ပြင်းထန်နေ

.

ကရင်နီ (ကယား) ပြည်နယ်၊ ဒီးမော့ဆိုမြို့နယ်အတွင်း တပ်စခန်းများ စွန့်လွှတ်ခဲ့ရသည့် စစ်ကောင်စီတပ်သည် ယနေ့ ဒီဇင်ဘာလ ၃ ရက်တွင် အင်အားအလုံးအရင်းဖြင့် စစ်ကြောင်းထိုးလာပြီး ကရင်နီပူးပေါင်းတပ်များနှင့် တိုက်ပွဲများ ပြင်းထန်စွာ ဖြစ်ပွားနေကြောင်း ပြည်သူ့ကာကွယ်ရေးတပ်-ဒီးမော့ဆို က သတင်းထုတ်ပြန်ထားသည်။

.

.

ဒီး‌မော့ဆိုမြို့နယ်ရှိ စစ်ကောင်စီတပ်စွဲထားသော သေးဆူလဲစခန်းကို နိုဝင်ဘာလ ၂၉ ရက်တွင် ဒီးမော့ဆို PDF နှင့် ပူးပေါင်းတပ်များမှ ဝင်ရောက်တိုက်ခိုက်ခဲ့ပြီးနောက် စစ်ကောင်စီတပ်သည် သေးဆူလဲစခန်းအပြင် ကုန်းသာကျေးရွာရှိ တပ်စခန်းကိုလည်း စွန့်ခွာထွက်ပြေးသွားခဲ့ပြီးနောက် အဆိုပါစခန်းအား ပြန်လည်ရရှိနိုင်ရေးအတွက် ယနေ့ ဒီဇင်ဘာလ ၃ ရက်တွင် အင်အားအလုံအရင်းဖြင့် ထိုးစစ်ဆင်လာခြင်းဖြစ်ကြောင်း သိရသည်။

.

စစ်ကောင်စီတပ်သည် ဒီးမော့ဆိုမြို့နယ်၊ ကြာဖူးဒေါးကျေးရွာ အပါအဝင် စစ်ကြောင်း ၃ ကြောင်းဖြင့် ထိုးစစ်ဆင်လာရာ ပူးပေါင်းတပ်ဖွဲ့များနှင့် ယနေ့ ဒီဇင်ဘာလ ၃ ရက်တွင် တစ်နေကုန်နီးပါး တိုက်ပွဲများ ပြင်းထန်ခဲ့ကြောင်း သိရသည်။

.

တိုက်ခိုက်မှုအတွင်း စစ်ကောင်စီတပ်ဘက်မှ ထိခိုက်သေဆုံးမှု များနိုင်ပြီး အသေးစိတ်ကို စိစစ်နေဆဲဖြစ်ကြောင်း ထုတ်ပြန်ချက်တွင် ဖော်ပြထားသည်။

.

တိုက်ပွဲတွင် စစ်ကောင်စီ၏ ငွေတောင်ခြေစိုက် ခလရ (၁၀၂) တပ်ရင်းနှင့် အမတ (၃၅၆) တပ်ရင်းမှ လက်နက်ကြီးများ ဖြင့် တစ်နေကုန် ပစ်ကူပေးခဲ့သော်လည်း အထိနာမှု များပြားသောကြောင့် ညနေ ၄ နာရီခန့်တွင် တိုက်လေယာဉ် ၂ စီးဖြင့် ၈ ကြိမ်ခန့်၊ ညနေ ၅ နာရီခန့်တွင် ၃ ကြိမ်ခန့်၊ စုစုပေါင်း ၁၁ ကြိမ်ခန့် ဗုံးကြဲပစ်ကူပေး တိုက်ခိုက်ခဲ့ကြောင်း သိရသည်။

.

စစ်ကောင်စီတပ်၏ ထိုးစစ်ကို ပြည်သူ့ကာကွယ်ရေးတပ်-ဒီးမော့ဆို (DMO-Local PDF)၊ KA၊ KNDF နှင့် အခြား တော်လှန်ရေးအင်အားစုများ ပူးပေါင်းကာ ခုခံတိုက်ပွဲဝင်ခဲ့ပြီး (DMO-Local PDF) တပ်ဖွဲ့မှ ရဲဘော် ၂ ဦး ထိခိုက် ဒဏ်ရာ ရရှိခဲ့ကြောင်း သိရသည်။

.

ဆက်လက်၍ တိုက်ပွဲများ ပြင်းထန်လာနိုင်သဖြင့် ပြည်သူများအနေဖြင့် မိမိလုံခြုံရေးကို အထူးဂရုစိုက်ကြရန် DMO-Local PDF က အသိပေးထားသည်။

.