စစ်ရေးနည်းလမ်းဖြင့် တိုက်ပွဲဝင်နေကြသည် ဆိုသော်လည်း တရားမဲ့ပြုကျင့်သူများ မဖြစ်ရန် လိုကြောင်း ပြည်ထောင်စုဝန်ကြီးချုပ် မှာကြား

.

စစ်ရေးနည်းလမ်းဖြင့် တိုက်ပွဲဝင်နေကြသည် ဆိုသော်လည်း မည်သည့်အခြေအနေမျိုးတွင်မဆို လူသားမဆန်သည့် တရားလက်လွတ် ပြုကျင့်သူများ မဖြစ်ရန် အရေးကြီးကြောင်း ပြည်ထောင်စုဝန်ကြီးချုပ် မန်းဝင်းခိုင်သန်းက ပြောဆို ခဲ့သည်ဟု သိရသည်။

.

.

အမျိုးသားညီညွတ်ရေးအစိုးရ၏ (၇၇) ကြိမ်မြောက် အစိုးရအဖွဲ့အစည်းအဝေးကို ယနေ့ ဒီဇင်ဘာလ ၆ ရက်၊ နံနက်ပိုင်းက ပြုလုပ်ရာ အစည်းအဝေးတွင် ပြည်ထောင်စုဝန်ကြီးချုပ်က ယင်းကဲ့သို့ ပြောဆိုခဲ့ခြင်းဖြစ်သည်။

.

အစည်းအဝေးတွင် အမျိုးသားညီညွတ်ရေးအစိုးရ၊ ယာယီသမ္မတ ဒူဝါလရှီးလက NUG အနေဖြင့် ပြည်သူ့အစိုးရစစ်စစ် ဖြစ်သည့်အတွက် ပြည်သူလူထု၏ သဘောထားဆန္ဒကို ဆန့်ကျင်သည့် လမ်းစဉ်/မူဝါဒများကို ချမှတ်အကောင်အထည် ဖော်မည်မဟုတ်ကြောင်း အဖွင့်အမှာစကား ပြောကြားခဲ့သည်။

.

ထို့နောက် ပြည်ထောင်စုဝန်ကြီးချုပ် မန်းဝင်းခိုင်သန်းက အမှာစကား ပြောကြားရာတွင် NUG အနေဖြင့် ရက်စက် ကြမ်းကြုတ်သူများကို အမြစ်ဖြတ်နိုင်ရေးအတွက် စစ်ရေးနည်းလမ်းအရ တိုက်ပွဲဝင်နေကြသည် ဆိုသော်လည်း မည်သည့်အခြေအနေမျိုးတွင်မဆို လူသားမဆန်သည့် အသိတရားမဲ့၊ တရားလက်လွတ်ပြုကျင့်သူမျး မဖြစ်ရန် အရေးကြီးကြောင်း၊ ကာကွယ်ရေးဝန်ကြီးဌာနအနေဖြင့် ယင်းသတင်းစကားကို တော်လှန်ရေးရဲဘော်များထံသို့ ပြန်လည်ပေးပို့ရန်လိုကြောင်း တိုက်တွန်းပြောကြားခဲ့သည်။

.

ဆက်လက်ပြီး ပြည်ထဲရေးနှင့် လူဝင်မှုကြီးကြပ်ရေးဝန်ကြီးဌာန၊ ပြည်ထောင်စုဝန်ကြီးက အကြမ်းဖက်စစ်အုပ်စုအဖြစ် ကြေညာရန်ကိစ္စကို တင်ပြခြင်း၊ အမျိုးသမီး၊ လူငယ်နှင့် ကလေးသူငယ်ရေးရာ ဝန်ကြီးဌာနက အလုံးစုံအုံကြွမှုနှင့် ပတ်သက်ပြီး ပြင်ဆင်မှုများကို တင်ပြခြင်းများ ပြုလုပ်ခဲ့ပြီး တင်ပြချက်များကို ပြည်ထောင်စုဝန်ကြီးချုပ်က ပြန်လည် ရှင်းလင်းဆွေးနွေးကာ ယာယီသမ္မတက နိဂုံးချုပ်အမှာစကား ပြောကြားခဲ့ကြောင်း သိရသည်။

.

အဆိုပါအစည်းအဝေးသို့ အမျိုးသားညီညွတ်ရေးအစိုးရ၊ ယာယီသမ္မတ ဒူဝါလရှီးလ၊ ပြည်ထောင်စုဝန်ကြီးချုပ် မန်းဝင်းခိုင်သန်းနှင့် ပြည်ထောင်စုဝန်ကြီးများ၊ ဒုတိယဝန်ကြီးများ တက်ရောက်ခဲ့ကြောင်း သိရသည်။

.