တောင်ကြီးတွင်လျှပ်စစ်မီတာခ ရက်လွန်ကြေး ပိုမိုတောင်းခံနေ

.

တောင်ကြီးမြို့တွင် လျှပ်စစ်ဓာတ်အားခ ပေးဆောင်ရာ၌ သတ်မှတ်ရက်ထက် ကျော်လွန်သည့် မီတာဖြတ်ပိုင်း များအား ရက်လွန်ဒဏ်ကြေးအဖြစ်ယခင်က ၂၀၀၀ ကျပ်တောင်းခံရာမှ ယခုအခါ ၃၀၀၀ ကျပ်အထိ ပိုမိုတိုးမြှင့်တောင်းခံနေ ကြောင်း သိရသည်။

.

.

ယင်းကဲ့သို့ ရက်လွန်ဒဏ်ကြေး တိုးမြှင့်တောင်းခံနေခြင်းသည် သတ်မှတ်ရက်အတွင်း မီတာခ ပေးဆောင်ရန် ငွေကြေး အခက်အခဲရှိသူများအတွက် ဝန်ထုပ်ဝန်ပိုးတစ်ခုလို ဖြစ်လာနေကြောင်း ဒေသခံများက ပြောဆိုကြသည်။

.

“အရင်တုန်းက ရက်ကျော်သွားရင် ဒဏ်ကြေးဆိုပြီး ၂၀၀၀ တောင်းတယ်။ အခုကျတော့ ရက်လွန်ကြေးက ၃၀၀၀ ဖြစ်သွားတယ်။ တကယ်ခက်ခဲနေတဲ့ လူတွေဆီက မသထာရေစာ တောင်းစားသလိုမျိုး ဖြစ်နေတယ်။ အလကား ရတဲ့ပိုက်ဆံကို အချောင်လိုချင်နေကြတာပေါ့” ဟု ရက်လွန်ဒဏ်ကြေး ပေးဆောင်ခဲ့ရသူတစ်ဦးက ပြောသည်။

.

တောင်ကြီးတွင် လျှပ်စစ်ဓာတ်အားခ ပေးဆောင်ရန် ကျန်ရှိနေသည့် နေအိမ်များ၊ ဈေးဆိုင်ခန်းများအားလည်း လျှပ်စစ် ဓာတ်အားများ လိုက်လံဖြတ်တောက်နေပြီး ကြွေးကျန်ပေးဆောင်သည့် အိမ်များတွင်လည်း ဓာတ်အား ပြန်လည် တပ်ဆင်လိုပါက တပ်ဆင်ခများ ကောက်ခံနေကြောင်း သိရသည်။

.

ယင်းကဲ့သို့ လျှပ်စစ်ဓာတ်အား ဖြတ်တောက်ခြင်း၊ သတ်မှတ်ရက်လွန်ဒဏ်ကြေး တိုးမြှင့်တောင်းယူခြင်းများ ပြုလုပ်နေသော်လည်း တောင်ကြီးမြို့တွင် လျှပ်စစ်မီး လာသည့်အချိန်မှာ နည်းပါးနေပြီး အချို့ရက်များတွင် တစ် ရက်လျှင် ၃ နာရီဝန်းကျင်သာ လျှပ်စစ်မီး ရရှိနေကြောင်း သိရသည်။

.