.
စစ်ကောင်စီတပ် အာဏာသိမ်းပြီးနောက်ပိုင်း စစ်ကိုင်းတိုင်း၊ ကန့်ဘလူခရိုင်အတွင်း စစ်ကောင်စီတပ် လက်ချက် ကြောင့် အသက်မပြည့်သေးသည့် ကလေးငယ် ၃ ဦး အပါအဝင် အရပ်သားပြည်သူ ၈၁ ဦး သေဆုံးခဲ့ကြောင်း ကျွန်းလှ တက်ကြွလှုပ်ရှားသူများအဖွဲ့က သတင်းထုတ်ပြန်ထားသည်။
.
.
ကျွန်းလှ တက်ကြွလှုပ်ရှားသူများအဖွဲ့၏ လက်လှမ်းမီသမျှ စုဆောင်းထားသော စာရင်းများအရ စစ်ကောင်စီတပ်၏ ပစ်ခတ်၊ ဖမ်းဆီးသတ်ဖြတ်ခြင်းများကြောင့် သေဆုံးသူစာရင်းများကို ထုတ်ပြန်ထားခြင်းဖြစ်ပြီး သောင်းနှင့်ချီသည့် ပြည်သူများမှာ စစ်ကြောင်းထိုးလာချိန်များ၌ နေရပ်စွန့်ခွာ ထွက်ပြေးတိမ်းရှောင်နေရကြောင်း ဖော်ပြထားသည်။
ကန့်ဘလူခရိုင်အတွင်းရှိ ကျွန်းလှမြို့နယ်မှ ပြည်သူ ၁၉ ဦးနှင့် ကန့်ဘလူမြို့နယ်မှ ၆၂ ဦး သေဆုံးခဲ့ခြင်းဖြစ်ကာ သေဆုံးမှုများတွင် လက်နက်ကြီးကျည် ထိမှန်၍ သေဆုံးခြင်း၊ အရှင်လတ်လတ် မီးရှို့သတ်ဖြတ်ခံရခြင်း၊ ဖမ်းဆီး သွားပြီးနောက် သတ်ဖြတ်ခံရခြင်းများ ပါဝင်သည်ဟု သိရသည်။
.
အသက်မပြည့်သေးသည့် သေဆုံး ကလေးငယ် ၃ ဦးမှာ မိဿလင်ကုန်းကျေးရွာနေ အသက် ၅ နှစ်အရွယ် မောင်အောင်မြင့်မြတ်၊ ဇီးကနားကျေးရွာနေ အသက် ၁၃ နှစ်အရွယ် မောင်ပိုင်ဆက်ထူးနှင့် လျှော်ဖြူကုန်းကျေးရွာနေ အသက် ၁၇ နှစ်အရွယ် မောင်ဝင်းဝင်းသူတို့ဖြစ်ကြောင်း သိရသည်။
.
ကန့်ဘလူခရိုင်အတွင်း စစ်ကောင်စီတပ်သားများနှင့် ၎င်းတို့ လက်နက်တပ်ဆင်ပေးထားသည့် ပျူစောထီး တပ်ဖွဲ့ဝင် များမှ ဒေသခံပြည်သူများ၏ နေအိမ်များအား ပစ်ခတ်ဝင်ရောက် စီးနင်း မီးရှို့ခြင်း၊ ပြည်သူပိုင် တန်ဖိုးရှိ ပစ္စည်းများအား လုယက်ခြင်း၊ ပြည်သူများအား ဖမ်းဆီး သတ်ဖြတ်ခြင်းများကို ဆက်တိုက်ပြုလုပ်နေလျက်ရှိကြောင်း ကျွန်းလှတက်ကြွ လှုပ်ရှားသူများအဖွဲ့က ထုတ်ပြန်ထားသည်။
.
