ကရင်နီ (ကယား) ပြည်နယ်တွင် နိုဝင်ဘာတစ်လအတွင်း တိုက်ပွဲ ၂၈ ကြိမ်ဖြစ်ပွားပြီး စစ်ကောင်စီတပ်သား ၄၀ ကျော် သေဆုံး

.

ကရင်နီ (ကယား) ပြည်နယ်တွင် ပြီးခဲ့သည့် နိုဝင်ဘာတစ်လတာအတွင်း စစ်ကောင်စီတပ်နှင့် ကရင်နီပူးပေါင်းတပ်များ အကြား တိုက်ပွဲပေါင်း ၂၈ ကြိမ် ဖြစ်ပွားခဲ့ပြီး စစ်ကောင်စီဘက်မှ တပ်သား ၄၃ ဦး သေဆုံးကာ ၃ ဦး ထိခိုက်ဒဏ်ရာရရှိ ခဲ့ကြောင်း KNDF က ထုတ်ပြန်ထားသည်။

.

.

စစ်ကောင်စီတပ်သည် နိုဝင်ဘာလအတွင်း လွိုင်ကော်မြို့နယ် အရှေ့ဘက်ခြမ်း ကျေးရွာများသို့ အကြမ်းဖက် စစ်ဆင်ရေး ပြုလုပ်ကာ စစ်ကြောင်းထိုးခဲ့ပြီး ကုန်းဆွတ်ကျေးရွာအနီးတွင် အပြင်းအထန် တိုက်ခိုက်ခဲ့ကာ ပါလောင်းကျေးရွာနှင့် ဒေါတယို့ကျေးရွာဝန်းကျင်တွင်လည်း စစ်ကောင်စီဘက်မှ ဝင်ရောက်တပ်စွဲထားသဖြင့် ထိတွေ့ တိုက်ပွဲများ ဖြစ်ပွားခဲ့ကြောင်း သိရသည်။

.

ထို့အတူ နိုဝင်ဘာလ နောက်ဆုံးအပတ်တွင် ဒီးမော့ဆိုမြို့နယ်၊ ကုန်းသာ၊ သေးဆူလဲကျေးရွာတို့မှ ရှမ်းကယားနယ်စပ် နန်းဖယ်ခုံမြို့နှင့် အနီးတဝိုက်ကျေးရွာများအထိ စစ်ကောင်စီတပ်များကို ကရင်နီ ပူးပေါင်းတပ်ဖွဲ့များမှ အပြင်းအထန် တိုက်ခိုက်ခဲ့ကြောင်း သိရသည်။

.

ဖရူဆိုမြို့နယ်၊ ဘောလခဲမြို့နယ်နှင့် ဖားဆောင်းမြို့နယ်ရှိ စစ်ကောင်စီ၏ တပ်စခန်းများကိုလည်း ကရင်နီပူးပေါင်းတပ်ဖွဲ့ များမှ နေ့စဉ်အလစ်အငိုက် တိုက်ခိုက်လျက်ရှိပြီး၊ စစ်ကောင်စီတပ်ဘက်မှ လေကြောင်းအသုံးပြုကာ အင်အား ဖြည့်တင်း တိုက်ခိုက်မှုများပြုလုပ်ခဲ့သည်ဟု ထုတ်ပြန်ချက်တွင် ဖော်ပြထားသည်။

.

တိုက်ပွဲများအတွင်း စစ်ကောင်စီတပ်မှ လက်နက်ကြီးများဖြင့် ပစ်ခတ်မှုကြောင့် အရပ်သားပြည်သူ ၂ ဦး သေဆုံးပြီး ၄၃ ဦး ဒဏ်ရာရရှိခဲ့ကာ နေအိမ် ၅၇ လုံး ပျက်စီးခဲ့ကြောင်း KNDF က ထုတ်ပြန်ထားသည်။

.

နိုဝင်ဘာလအတွင်း စစ်ကောင်စီတပ်များကို ခုခံတိုက်ခိုက်ရင်း KNDF မှ ရဲဘော် ၂ ဦး ကျဆုံးခဲ့ရပြီး စစ်ကောင်စီ ဘက်မှ တပ်သားတစ်ဦး လက်နက်အပြည့်အစုံဖြင့် ပြည်သူ့ဘက်သို့ ဘက်ပြောင်း ပူးပေါင်းကာ CDM ပြုလုပ်ခဲ့ကြောင်း သိရသည်။

.

ဒီးမော့ဆိုမြို့နယ်နှင့် နန်းဖယ်ခုံမြို့တို့တွင် စစ်ရေးအရှိန် မြင့်လျက်ရှိပြီး ထိတွေ့တိုက်ပွဲများ မကြာခဏ ဖြစ်ပွားနေ သဖြင့် ပြည်သူများ လုံခြုံရေး သတိရှိကြရန် KNDF က အသိပေးထားသည်။

.