တံတားဦး BGF မှ လက်နက်ကြီးများဖြင့် ပစ်ခတ်မှုကြောင့် လူနေအိမ်နှင့် ဘုရားကျောင်း ထိမှန်ပျက်စီး

.

တံတားဦး BGF စခန်းတစ်ခုက နိုဝင်ဘာလ ၂၉ ရက်၊ ညပိုင်းတွင် ကျေးရွာအတွင်းသို့ လက်နက်ကြီးများဖြင့် ပစ်ခတ်မှု ကြောင့် လူနေအိမ်များနှင့် ဘုရားကျောင်းတို့ ထိမှန်ပျက်စီးခဲ့ကြောင်း ကရင်အမျိုးသားအစည်းအရုံး (KNU) က ယမန်နေ့ နိုဝင်ဘာလ ၃၀ ရက်၊ ညပိုင်းတွင် ထုတ်ပြန်ထားသည်။

.

.

BGF အမှတ် (၁၀၀၄) လက်အောက်ခံ တပ်ခွဲ (၁) တံတားဦး BGF မှ ဗိုလ်မောင်ကြီး ဦးဆောင်သော တပ်စခန်းက နိုဝင်ဘာလ ၂၉ ရက်၊ ည ၁၀ နာရီခွဲမှ ၁၁ နာရီခွဲအတွင်း လက်နက်ကြီး ၉ လုံး ပစ်ခတ်ခဲ့ခြင်းဖြစ်ကြောင်း သိရသည်။

.

ယင်းကဲ့သို့ လက်နက်ကြီးများဖြင့် ပစ်ခတ်မှုကြောင့် KNU ဘီးလင်းမြို့နယ်အတွင်းရှိ ဘုရားကျောင်းနှင့် လူနေအိမ် ၉ လုံး လက်နက်ကြီးစထိမှန် ပျက်စီးခဲ့ကြောင်း သိရသည်။

.

BGF (၁၀၁၄) လက်အောက်ခံတပ်များသည် KNU-သထုံခရိုင်အတွင်း လူ့အခွင့်အရေးချိုးဖောက်မှုများကို အစဉ်မပြတ် ကျူးလွန်လျက်ရှိပြီး BGF (၁၀၁၄) လက်အောက်ခံ မောင်တင်ဝင်းဦးဆောင်သော တပ်ခွဲ (၂) ဘုရားကုန်းစခန်းမှ အရပ်သား ၄၀ ဦးအား စခန်းတိုးချဲ့တည်ဆောက်ရန် အတွက် နိုဝင်ဘာလ ၃ ရက်က အတင်းအဓမ္မ ခေါ်ယူစေခိုင်း နေကြောင်း KNU ၏ ထုတ်ပြန်ချက်တွင် ဖော်ပြထားသည်။

.

ထို့အပြင် BGF (၁၀၁၄) တပ်ခွဲ (၂) လက်အောက်ခံ ညောင်ကုန်း BGF စစ်ဆေးရေးဂိတ်စခန်းမှလည်း လက်နက်ကြီး၊ လက်နက်ငယ်များ မကြာခဏ ပစ်ခတ်လျက်ရှိကြောင်း KNU က ဆိုသည်။

.

[ Photo – KNU ]

.