စစ်ကောင်စီအဖွဲ့နှင့် စီးပွားရေးသမားများ အပါအဝင် လူပုဂ္ဂိုလ် ၁၉ ဦးတို့ကို EU ဒဏ်ခတ်အရေးယူ

.

စစ်‌ကောင်စီအဖွဲ့နှင့်  စီးပွားရေးသမား ၃ ဦး အပါအဝင် လူပုဂ္ဂိုလ် ၁၉ ဦးကို တိုးချဲ့ပစ်မှတ်ထား အရေးယူဆောင်ရွက် သွားမည်ဖြစ်ကြောင်း ဥရောပသမဂ္ဂ (EU) က နိုဝင်ဘာလ ၈ ရက်တွင် ကြေညာခဲ့သည်။

.

.

စစ်အာဏာသိမ်းပြီးနောက် အကြမ်းဖက်မှုများ မြင့်တက်လာပြီး ပြင်းထန်သော လူ့အခွင့်အရေးချိုးဖောက်မှုများ ဆက်လက်ဖြစ်ပွားနေခြင်းကြောင့် ပဉ္စမအကြိမ် ပြစ်ဒဏ်ခတ်ပိတ်ဆို့မှုကို အတည်ပြုခဲ့​ကြောင်း EU က ကြေညာ ထားသည်။

.

EU မှ အရေးယူဒဏ်ခတ်မည့် လူပုဂ္ဂိုလ် ၁၉ ဦး စာရင်းတွင် စစ်​ကောင်စီ၏ ရင်းနှီးမြှုပ်နှံမှုနှင့် နိုင်ငံခြားစီးပွား ဆက်သွယ်ရေးဝန်ကြီး ဦးကံဇော်၊ တရားလွှတ်တော်ချုပ် တရားသူကြီးချုပ် ဦးထွန်းထွန်းဦး၊ တပ်မတော်နှင့် တပ်မတော် (လေ)မှ အဆင့်မြင့်အရာရှိများ၊ ပြည်ထောင်စု ရွေးကောက်ပွဲ ကော်မရှင်အဖွဲ့ဝင်များနှင့် တပ်မတော်နှင့် အနီးကပ် ဆက်နွယ်ပြီး ချိတ်ဆက်ပံ့ပိုး ပေးလျက်ရှိသည့် ပုဂ္ဂလိကကုမ္ပဏီများမှ စီးပွားရေး ကိုယ်စားလှယ်များ ပါဝင်​ကြောင်း သိရသည်။

.

ထို့အပြင် မြန်မာနိုင်ငံတွင် ဒီမိုကရေစီနှင့် တရားဥပဒေစိုးမိုးရေးကို ထိခိုက်စေရန် အဓိကအခန်းကဏ္ဍမှ ပါဝင်လျက်ရှိပြီး နိုင်ငံအတွင်း ငြိမ်းချမ်းရေး၊ လုံခြုံရေးနှင့် တည်ငြိမ်ရေးတို့ကို ခြိမ်းခြောက်သည့် လုပ်ရပ်များ ဆောင်ရွက်လျက်ရှိသည့် စစ်ကောင်စီလည်း အဆိုပါစာရင်းတွင် ပါဝင်​ကြောင်း ​ဖော်ပြထားသည်။

.

အရေးယူခံရတဲ့ စီးပွားရေး လုပ်ငန်းရှင် ၃ ဦးအနက် ဦးတေဇနှင့် ဦးနိုင်ထွဋ်အောင်တို့သည် ၂ဝ၁၇ ခုနှစ် ရိုဟင်ဂျာ နယ်မြေရှင်းလင်းရေးဖြစ်ရပ်တွင် စစ်တပ်ကို ငွေကြေးထောက်ပံ့ခဲ့ကြပြီး ဦးအောင်မျိုးမြင့်မှာ စစ်တပ်အတွက် လက်နက်ပွဲစား လုပ်ပေးခဲ့ကြောင်း ဖော်ပြထားသည်။

.

စာရင်းသွင်းခံရသူများသည် ပိုင်ဆိုင်မှု ထိန်းချုပ်ခံရခြင်း နှင့် ခရီးသွားလာခွင့် ပိတ်ပင်ခြင်းများ ခံရပြီး ၎င်းတို့အား ဥရောပသမဂ္ဂနယ်မြေအတွင်း ဝင်ရောက်ခြင်း သို့မဟုတ် ဖြတ်သန်းခြင်းမှ တားဆီးထားသည့်အပြင် ဥရောပသမဂ္ဂမှ လူပုဂ္ဂိုလ်များနှင့် အဖွဲ့အစည်းများသည် ပြစ်ဒဏ်ခတ်ပိတ်ဆို့ရန် စာရင်းသွင်းခံထားရသူများကို ရန်ပုံငွေရရှိစေခြင်းအား တားမြစ်ထား​ကြောင်း ​ထုတ်ပြန်ချက်တွင် ပါရှိသည်။

.