၉၂ နှစ်အတွင်း ကမ္ဘာ့ဖလားအဖွင့်ပွဲ အိမ်ရှင်နိုင်ငံရှုံးသည့်အသင်းအဖြစ် ကာတာ မှတ်တမ်းဝင်

.

အရှေ့အလယ်ပိုင်းဒေသ နိုင်ငံတစ်ခုဖြစ်သည့် ကာတာနိုင်ငံတွင် ယမန်နေ့ ၂၀၂၂ ခုနှစ် နိုဝင်ဘာလ ၂၀ ရက်က စတင် ကျင်းပပြုလုပ်နေသည့် ကမ္ဘာ့ဖလားဘောလုံးပြိုင်ပွဲ အဖွင့်ပွဲစဉ်တွင် အိမ်ရှင်ကာတာနိုင်ငံအသင်းက အီကွေဒေါ အသင်းကို ရှုံးနိမ့်သွားသည့်အတွက် ၉၂ နှစ်အတွင်း အဖွင့်ပွဲစဉ် အိမ်ရှင်ရှုံးသည့် အသင်းအဖြစ် မှတ်တမ်းဝင်သွားခဲ့ ကြောင်း သိရသည်။

.

.

အဆိုပါအဖွင့်ပွဲစဉ်တွင် အိမ်ရှင်ကာတာအသင်းနှင့် တောင်အမေရိကနိုင်ငံ အသင်းတစ်ခုဖြစ်သည့် အီကွေဒေါအသင်းတို့ ယှဉ်ပြိုင်ကစားခဲ့ရာ ပွဲချိန်ပထမပိုင်းမှာပင် အီကွေဒေါအသင်းက ၂ ဂိုးသွင်းယူကာအနိုင် ရသွားခြင်းဖြစ်ကြောင်း သိရသည်။

.

အီကွေဒေါအသင်းသည် ပွဲချိန် ၁၆ မိနစ်တွင် ပင်နယ်တီမှ ဗွေဆော်ဦးဂိုးကို ရရှိခဲ့ပြီး ပွဲချိန် ၃၁ မိနစ်တွင် ဒုတိယအနိုင်ဂိုး ကို ထပ်မံရရှိကာ အုပ်စုအေတွင် ရမှတ် ၃ မှတ်ဖြင့် ဦးဆောင်နေသည်။

.

အုပ်စုအေမှ ဟော်လန်အသင်းနှင့် ဆီနီဂေါအသင်းတို့သည် ယနေ့ နိုဝင်ဘာလ ၂၁ ရက်တွင် ယှဉ်ပြိုင်သွားရန် ရှိနေသည်။

.

ကာတာနိုင်ငံတွင် ကျင်းပနေသည့် ကမ္ဘာ့ဖလားဘောလုံးပြိုင်ပွဲသည် ၉၂ နှစ်အတွင်း ၂၃ ကြိမ်မြောက် ကျင်းပသည့် ကမ္ဘာ့ဖလားဘောလုံးပြိုင်ပွဲဖြစ်ပြီး ပြိုင်ပွဲကျင်းပနိုင်ရေးအတွက် ဆောက်လုပ်ရေးလုပ်ငန်းခွင်များအတွင်း ရွှေ့ပြောင်း လုပ်သား ၆ ထောင်ကျော် အသက်ဆုံးရှုံးခဲ့ရသည့်အတွက် ဝေဖန်မှုများလည်း ရှိနေသည်။

.