ရခိုင်တွင် စစ်ရှောင်စခန်းတာဝန်ခံများကို စစ်ကောင်စီက လိုက်လံဖမ်းဆီးနေ

.

ရခိုင်ပြည်နယ်တွင် စစ်ရှောင်စခန်း တာဝန်ခံများကို စစ်ကောင်စီတပ်က လိုက်လံဖမ်းဆီးမှုများ ရှိနေသည့်အတွက် စစ်ရှောင်ပြည်သူများအတွက် စားနပ်ရိက္ခာနှင့် နေထိုင်ရေးအခက်အခဲများ ကြုံတွေ့နေရကြောင်း သိရသည်။

.

.

ရခိုင်ပြည်နယ်အတွင်းရှိ စစ်ရှောင်စခန်းများကို ပြီးခဲ့သည့် အောက်တိုဘာလ ၃၁ ရက်က အပြီး ဖျက်သိမ်းကာ စစ်ရှောင်များ နေရပ်ပြန်ရန် စစ်ကောင်စီက အမိန့်ထုတ်ပြန်ထားပြီးနောက် ယခုကဲ့သို့ စစ်ရှောင်စခန်း တာဝန်ခံ များကို လိုက်လံဖမ်းဆီးနေခြင်းဖြစ်ကြောင်း သိရသည်။

.

လက်ရှိတွင် စစ်ကောင်စီသည် မြောက်ဦးမြို့ပေါ်နှင့် တိမ်ညိုကျေးရွာမှ စစ်ရှောင်စခန်းတာဝန်ခံများကို ရခိုင့်တပ်တော် (AA) နှင့် ဆက်စပ်သည်ဟုဆိုကာ အဓိကထား ရှာဖွေနေကြောင်း သိရသည်။

.

ထို့အပြင် စစ်ရှောင်များကို အကူအညီပေးနိုင်ရေးအတွက် ဖုန်းလိုင်းအခက်အခဲအပြင် လျှပ်စစ်မီးရရှိမှု အခက်အခဲ များကြောင့် ဆက်သွယ်ရန် ခက်ခဲနေကြောင်း ဒေသခံများထံက သိရသည်။

.

ရခိုင်ပြည်နယ်တွင် နိုဝင်ဘာလ ပထမပတ်အတွင်း ဖြစ်ပွားခဲ့သည့် တိုက်ပွဲများ၌ စစ်ကောင်စီတပ်၏ လက်နက်ကြီးဖြင့် ပစ်ခတ်မှုကြောင့် အသက် ၈ နှစ်အရွယ် ကလေးငယ် တစ်ဦးနှင့် အသက် ၈၀ ကျော် အဖိုးအိုတစ်ဦး အပါအဝင် ၇ ဦး သေဆုံးခဲ့ပြီး ၁၀ ဦး ထိခိုက်ဒဏ်ရာရရှိခဲ့ကြောင်း သိရသည်။

.