တောင်ကြီးမြို့ပေါ်ရှိ စစ်ကောင်စီခန့် ရပ်ကွက်အုပ်ချုပ်ရေးမှူးများကို ယခု နိုဝင်ဘာလမှ စတင်၍ အစားထိုး ခန့်အပ်၍ အပြောင်းအလဲ ပြုလုပ်သွားမည် ဖြစ်ကြောင်း သိရသည်။
.
မြို့ပေါ် ၂၂ ရပ်ကွက် အနက် ၅ ရပ်ကွက်ကို ပထမအကြိမ်အနေဖြင့်
အပြောင်းအလဲ ပြုလုပ်ရန် စီစဉ်ထားခြင်း ဖြစ်သည်ဟု သိရသည်။
.
“ သစ်တော၊ ဘုရားဖြူ၊ ကန်အောက်၊ ရေအေးကွင်း၊ စဝ်စံထွန်း
ရပ်ကွက်အုပ်ကြီးတွေကို ပထမအကြိမ် အနေနဲ့ ပြောင်းလဲမှာပါ။ ရွေးကောက်ပွဲအတွက် ကြိုတင်ပြင်ဆင်တာလို့
မြင်ပါတယ်။” ဟု အမည် မဖော်လိုသူ သတင်းရင်းမြစ် တစ်ဦးက ပြောသည်။
.
အဆိုပါ ရပ်ကွက်အုပ်ချုပ်ရေးမှူး အပြောင်းအလဲ ပြုလုပ်မည့်
ရပ်ကွက်များအနက် စဝ်စံထွန်း၊ ဘုရားဖြူနှင့် သစ်တောရပ်ကွက်များမှာ စစ်တပ် အခြေစိုက်သည့်
ရပ်ကွက်များ ဖြစ်သည်။
.
“ တပ်မဲရုံ၊ အထူးသဖြင့် တပ်မိသားစုဝင်တွေ မဲပေးကြတဲ့ ရပ်ကွက်တွေပေါ့။
ပြီးခဲ့တဲ့ ရွေးကောက်ပွဲက တပ်မဲရုံတွေမှာ ရှုံးခဲ့တာကို သုံးသပ်ပြီး ကြိုတင်ပြင်ဆင်တာမျိုးလည်း
ဖြစ်နိုင်တယ်။ ဒါပေမယ့် သတင်းမှာ ပါလာရင်တော့ အပြောင်းအလဲ ဖြစ်သွားနိုင်သေးတယ်။” ဟု
သတင်းရင်းမြစ် က ဆိုသည်။
.
သတင်းမီဒီယာများတွင် ဖော်ပြလာသည့် အကြောင်းအရာများကို စစ်ကောင်စီက
ပြောင်းပြန် ပြုလုပ်လေ့ ရှိသည့်အတွက် ယင်း အစီအစဉ်မှာ အချိန်နှင့်အမျှ ပြောင်းလဲသွားနိုင်သည်ဟု
၎င်းက ရှင်းပြသည်။
.
ထို့အတူ အထွေထွေအုပ်ချုပ်ရေး အပါအဝင် ဌာနဆိုင်ရာများတွင်
အရေးကြီးတာဝန်များကို တပ်မိသားစုဝင် သို့မဟုတ် ၎င်းတို့ ယုံကြည် စိတ်ချရသူသည့် ဝန်ထမ်းများဖြင့်
အစားထိုး ခန့်အပ်မှုများလည်း ပြုလုပ်ခဲ့သည်ဟု သိရသည်။
.
“ တပ်က သူတို့ လုပ်စရာ ရှိတာကို ပုံမှန်အတိုင်း လုပ်နေတာ။
သတင်း မပေါက်ကြားအောင် တော်တော်ထိန်းတယ်။ ရွေးကောက်ပွဲကို ပုံမှန်အတိုင်း လုပ်မယ်ဆိုရင်
သူတို့ မနိုင်ဘူးဆိုတာ သိတယ်။ နိုင်အောင်လို့ မရ ရတဲ့နည်းနဲ့ လုပ်မှာပဲ။” ဟု သတင်းရင်းမြစ်
တစ်ဦးကလည်း ပြောသည်။
.
