.
တူရကီနိုင်ငံ၊ အစ္စတန်ဘူလ်မြို့ရှိ
လူသွားလူလာ များပြားသည့် လမ်းမတစ်ခုပေါ်တွင် ယမန်နေ့ နိုဝင်ဘာလ ၁၃ ရက်၊ ညနေပိုင်းက
ပေါက်ကွဲမှုဖြစ်ပွားခဲ့ပြီး လူ ၈ ဦး သေဆုံးကာ ၈၁ ဦးထက်မနည်း ဒဏ်ရာရရှိခဲ့ကြောင်း သိရသည်။
.
Beyoglu ခရိုင်ရှိ
တူရကီ၏ အကြီးဆုံးမြို့တော် အစ္စတန်ဘူလ်၏ လမ်းမများတွင် ဈေးဝယ်သူများ၊ ခရီးသွားများနှင့်
ပုံမှန်အတိုင်း စည်ကားနေချိန်တွင် ပေါက်ကွဲမှုဖြစ်ပွားခဲ့ခြင်းဖြစ်ကြောင်း သိရသည်။
.
အဆိုပါ ပေါက်ကွဲမှုနှင့်
ပတ်သက်၍ တူရကီရဲတပ်ဖွဲ့က လူ ၂၂ ဦးကို ဖမ်းဆီးထားသည်ဟု သိရသည်။
.
အင်ဒိုနီးရှားနိုင်ငံတွင်
ကျင်းပမည့် G20 ထိပ်သီးအစည်းအဝေးသို့
မထွက်ခွာမီတွင် တူရကီသမ္မတ အာဒိုဂန်က ပေါက်ကွဲမှုသည် သစ္စာမဲ့ တိုက်ခိုက်မှုဖြစ်ပြီး
ကျူးလွန်သူများကို အပြစ်ပေးသွားမည်ဟု ကတိပေး ပြောဆိုခဲ့သည်။
.
“တိုက်ခိုက်မှု နောက်ကွယ်က
တရားခံတွေ ထိုက်သင့်သလောက် အပြစ်ပေးခံရမယ်ဆိုတာ ကျွန်တော်တို့ ပြည်သူတွေ စိတ်ချယုံကြည်လို့ရပါတယ်”
ဟု သမ္မတ အာဒိုဂန်က ပြောဆိုခဲ့သည်။
.
ပေါက်ကွဲမှုအတွင်း
လူ ၈ ဦး သေဆုံးခဲ့ပြီး ၈၁ ဦး ထိခိုက်ဒဏ်ရာ ရရှိခဲ့ကြောင်း တူရကီပြည်ထဲရေးဝန်ကြီး ဆူလေမန်
ဆွိုင်လူက အတည်ပြု ပြောဆိုထားသည်။
.
ပေါက်ကွဲမှုသည် ဒေသစံတော်ချိန်
ညနေ ၄ နာရီ ၂၀ မိနစ်ခန့်တွင် ဖြစ်ပွားခဲ့ခြင်းဖြစ်ပြီး အွန်လိုင်းပေါ်တွင် ပြန့်နှံ့
လာသော ဗွီဒိယိုဖိုင်တစ်ခုအရ ပေါက်ကွဲမှုဖြစ်ပွားပြီးနောက် လမ်းသွားလမ်းလာများ ထွက်ပြေးနေပြီး
မီးတောက်များ၊ ပေါက်ကွဲသံများ ကျယ်လောင်စွာ ထွက်ပေါ်လာသည်ကို တွေ့ရသည်။
.
ပေါက်ကွဲမှုတွင် အသက်ဆုံးရှုံးသွားသူများအတွက်
ဝမ်းနည်းကြေကွဲကြောင်းကိုလည်း မြို့တော်ဝန် Ekrem Imamoglu က တွစ်တာတွင် ရေးသားထားသည်။
.
တူရကီနိုင်ငံတွင်
၂၀၁၅ မှ ၂၀၁၇ ခုနှစ်အတွင်း လူအသေအပျောက်များသော ဗုံးခွဲတိုက်ခိုက်မှုများကို IS နှင့် PKK အဖွဲ့များမှ
လုပ်ဆောင်ခဲ့ဖူးပြီး ယခု ဗုံးခွဲတိုက်ခိုက်မှုဖြစ်စဉ်တွင်လည်း PKK အဖွဲ့မှ ဟု ယူဆရသည့် အမျိုးသမီးတစ်ဦး ကို ရုပ်သံမှတ်တမ်းတစ်ခုတွင် တွေ့ရှိခဲ့ရသည်ဟု
သတင်းများက ဖော်ပြကြသည်။
.
တူရကီတရားရေးဝန်ကြီး
Bekir Bozdag က
အဆိုပါအမျိုးသမီးသည် လမ်းပေါ်ရှိ ခုံတန်းလျားတစ်ခုတွင် မိနစ် ၄၀ ကျော်ကြာ
ထိုင်နေသည်ကို တွေ့ရှိခဲ့ကြောင်း A Haber ရုပ်မြင်သံကြားသို့ ပြောကြားခဲ့သည်။
.
အဆိုပါ တိုက်ခိုက်မှုနှင့်
ပတ်သက်၍ ဂရိ၊ အီဂျစ်၊ ယူကရိန်း၊ ဗြိတိန်၊ အဇာဘိုင်ဂျန်၊ အီတလီနှင့်
ပါကစ္စတန်အပါအဝင် နိုင်ငံများက ရှုတ်ချကြောင်း ပြောဆိုထားပြီး ဥရောပသမဂ္ဂကောင်စီ အကြီးအကဲ
ချားလ်စ်မီရှဲလ် ကလည်း သေဆုံးသူ များအတွက် ဝမ်းနည်းကြောင်း ၎င်း၏ တွစ်တာတွင် ရေးသားထားသည်။
.
[ Source - AL
JAZEERA ]
.
