နမ့်စန်တွင် ကျောင်းသားချင်း ရန်ဖြစ်ကာ တစ်ဦး သေဆုံးခဲ့ရသော်လည်း တာဝန်ယူ ဖြေရှင်းပေးမည့်သူ မရှိဘဲ ဖြစ်နေ

နမ့်စန်မြို့ရှိ အထကကျောင်း၌ ယခု ရက်ပိုင်းအတွင်း ကျောင်းသားချင်း ရန်ဖြစ်ကာ ကျောင်းသား တစ်ဦး သေဆုံးခဲ့ရသော်လည်း တာဝန်ယူ ဖြေရှင်းပေးမည့်သူ မရှိဘဲ ဖြစ်နေကြောင်း သိရသည်။

.

ပြီးခဲ့သည့် နိုဝင်ဘာလ ၂ ရက်က ကျောင်းသားချင်း ခိုက်ရန် ဖြစ်ပွားကာ စနစ်သစ် ဆယ်တန်းကျောင်းသား မောင်အောင်မော်ဟိန်း တွင် ဒဏ်ရာမနား ရရှိကာ ဆေးကုသမှု ခံယူနေစဉ် ရရှိသည့် ဒဏ်ရာများကြောင့် သေဆုံးခဲ့ရခြင်း ဖြစ်သည်။

.

" နမ့်စန်ကနေ တောင်ကြီးစဝ်စံထွန်း၊ အဲဒီကနေ နေပြည်တော်ကို ဆက် ပို့ရတာ။ နေပြည်တော်မှာ X Ray အဖြေတောင် မရသေးဘူး ဆုံးသွားတာ။" ဟု သတင်းရင်းမြစ် တစ်ဦးက ပြောသည်။

.

မောင်အောင်မော်ဟိန်း ကို နမ့်စန်မြို့ရှိ မိုးမခ ဆေးခန်းမှ တဆင့် တောင်ကြီးစဝ်စံထွန်းဆေးရုံသို့ ပို့ဆောင်ကာ ဆေးကုသရာ မသက်သာ၍ နိုဝင်ဘာလ ၃ ရက်တွင် နေပြည်တော် ဆေးရုံသို့ ဆက်လက် ပို့ဆောင်ကုသစဉ် နိုဝင်ဘာလ ၅ ရက်၊ နံနက် ၂ နာရီခဲ့တွင် သေဆုံးခဲ့ခြင်း ဖြစ်သည်ဟု သိရသည်။

.

အဆိုပါ ပြစ်မှုကျူးလွန်သူ ကျောင်းသားမှာ နမ့်စန်လေတပ်အတွင်း၌ နေထိုင်သူ ကျောင်းသား တစ်ဦး ဖြစ်သည်ဟုသာ သိရသော်လည်း ၎င်းနှင့်ပတ်သက်သည့် အချက်အလက်များကိုမူ မသိရသေးပေ။

.

" ရိုက်လိုက်တဲ့ ကျောင်းသားက လေတပ်ထဲက။ ကျောင်းအုပ်ကြီးနဲ့ ပေါင်းပြီး သတင်းဖုံးဖို့ ကြိုးစားနေပါတယ်ဗျ။ ရိုက်လိုက်တဲ့ ကလေး မိဘရော၊ ကျောင်းအုပ်ကြီးရော ခုထိ ဘာတာဝန်ယူမှု တာဝန်ခံမှုမှ မလုပ်ပေးသေးဘူး။ ကျောင်းအုပ်ကြီးက ပို ဆိုးတယ်၊ ဘာမှ မသိဘူး ဆိုပြီးဘဲ ပြောနေတယ်။" ဟု ဒေသခံ တစ်ဦးက ပြောသည်။

. 

သေဆုံးသူ ကျောင်းသား၏ မိဘများမှာ လက်လုပ်လက်စား ဆင်းရဲသူများ ဖြစ်ကြပြီး ဆေးကုသမှု ကုန်ကျစရိတ်ကိုလည်း ချေးငှားကာ ဆောင်ရွက်ခဲ့ရသည်ဟု သိရသည်။

.

" သူတို့ အာဏာ ပြသမျှ ကြောက်ရတယ်။ ကျွန်‌တော်တို့ သူငယ်ချင်းအတွက်လည်း စိတ်မကောင်းပါဘူး။ အဲတော့ တာဝန်ယူမှု တာဝန်ခံမှု ရှိစေချင်တယ်။ တာဝန်ယူမှု မရှိရင် ဖြစ်လာမယ့် အကျိုးဆက်ကို ခံရမှာပဲလို့ ပြောချင်တယ်။" ဟု ကျောင်းသား တစ်ဦးက ပြောသည်။