အာဏာသိမ်းစစ်ကောင်စီ၏ ခမရ(၉) (ဝီယော်) စခန်းနှင့် လေ့ကျင့်ရေး (၉) (အလံတစ်ရာ) စခန်းတို့မှ သထုံမြို့နယ်၊ ဝီယော်ကျေးနယ်အုပ်စု၊ ထုံးဘိုလေးရွာထဲသို့ လက်နက်ကြီးများဖြင့် ပစ်ခတ်ခဲ့၍ လူနေအိမ် ၆ လုံး ထိခိုက်ပျက်စီးခဲ့သည်ဟု သိရသည်။
.
စစ်ကောင်စီ တပ်စခန်းများမှ နိုဝင်ဘာလ ၁၁ ရက်၊ ည ၈ နာရီခွဲကျော်ခန့်တွင် လက်နက်ကြီး ၈ လုံးပစ်ခတ်မှုကြောင့် ထုံးဘိုလေးကျေးရွာမှ ဒေါ်ဖောစေး၊ ဦးပန်းစိန်၊ ဦးဖားဘဲ၊ နောဒို့၊ ဦးကျေဇော၊ စောထေ့ဖိုး တို့၏ နေအိမ်များ ပျက်စီးခဲ့သည့် အပြင် ရာဘာပင်များလည်း ထိခိုက်ပျက်စီးခဲ့သည်ဟု KNU က ထုတ်ပြန်သည်။
.
ပြီးခဲ့သည့် ဇွန်လ ၂၅ ရက်ကလည်း ထုံးဘိုလေးကျေးရွာကို စစ်ကောင်စီတပ်များက မီးတင်ရှို့ခဲ့သဖြင့် လူနေအိမ် ၆၁ လုံး မီးလောင်ပြာကျခဲ့ရသည်။
.
ထို့အတူ ကျေးရွာဘုန်းတော်ကြီးကျောင်းနှင့် ကျေးရွာ စာသင်ကျောင်းလည်း မီးရှို့ခံခဲ့ရသည့်အပြင် ရွာသား ၃ ဦးလည်း သတ်ဖြတ်ခံခဲ့ရကြောင်း သိရသည်။
.
ယင်းကဲ့သို့ စစ်ကောင်စီတပ်၏ မီးတင်ရှို့မှုကြောင့် ထုံးဘိုလေးရွာရှိ ဒေသခံ ရွာသူ၊ ရွာသားများမှာ ယာယီတဲအိမ်များ ပြုလုပ်၍ နေထိုင်ကြရပြီး ယခုတွင် စစ်ကောင်စီတပ်များက လက်နက်ကြီးများဖြင့် ထပ်မံ ပစ်ခတ်ခဲ့ခြင်း ဖြစ်ကြောင်း သိရသည်။
