ဟဲဟိုးနှင့် ရွှေညောင်မြို့ကြား၊ တောင်ကြီး-အောင်ပန်းသွားလမ်း၊ ဘဝသံသရာတံတား အနီး၌ ယနေ့ နိုဝင်ဘာလ ၇ ရက်၊ နံနက် ၁၀ နာရီခန့်က မော်တော်ယာဉ် တိမ်းမှောက်သဖြင့် ကလေးငယ် ၆ ဦး အပါအဝင် ၂၂ ဦး ထိခိုက် ဒဏ်ရာ ရရှိခဲ့ကြောင်း သိရသည်။
.
တိမ်းမှောက်သည့် ယာဉ်မှာ ကလောမြို့နယ်၊ ကျောက်တန်းရွာရှိ အဆောက်အဦ ဆောက်လုပ်ရေး မိသားစုဝင်များ လိုက်ပါ စီးနင်းလာသည့် Canter ယာဉ် ဖြစ်ကာ ဘဝသံသရာ တံတားအနီးရှိ ကျောက်စရစ် လမ်းခင်းကျောက် ထုတ်သည့် နေရာ၌ တိမ်းမှောက်ခြင်း ဖြစ်သည်ဟု သိရသည်။
.
ယာဉ် တိမ်းမှောက်သည့် အကြောင်းအရင်းကိုမူ မသိရသေးပေ။
.
အဆိုပါ ထိခိုက်ဒဏ်ရာရရှိခဲ့သူများကို လူမှုကူညီရေးအသင်းဝင်များက ဟဲဟိုးဆေးရုံမှ တဆင့် တောင်ကြီးမြို့ စဝ်စံထွန်းဆေးရုံသို့ လူနာတင်ယာဥ် ၆ စီးဖြင့် ပို့ဆောင်ခဲ့ကြောင်း သိရသည်။
