တောင်ကြီးတွင် စားအုန်းဆီတစ်ပိဿာ ရရှိရေးအတွက် အလုအယက် တန်းစီဝယ်ယူနေရ

.

တောင်ကြီးမြို့ပေါ် နေရာအချို့တွင် ယနေ့ နိုဝင်ဘာလ ၁၀ ရက်၊ နံနက်ပိုင်းက စားအုန်းဆီများကို မိုဘိုင်းစနစ်ဖြင့် လိုက်လံရောင်းချပေးလျက်ရှိရာ ဆီတစ်ပိဿာ ရရှိရေးအတွက် အလုအယက် တန်းစီဝယ်ယူနေရကြောင်း သိရသည်။

.

.

ထိုသို့ ရောင်းချရာတွင် လူတစ်ဦးလျှင် တိုကင်ပြားတစ်ခုစီပေး၍ စားအုန်းဆီတစ်ပိဿာ ၄၇၀၀ ကျပ်နှုန်းဖြင့် ရောင်းချပေးနေခြင်း ဖြစ်ကြောင်းသိရသည်။

.

“အခုလိုလာရောင်းပေးတော့ တကယ်လိုအပ်တဲ့ လူတွေအတွက် အဆင်ပြေတာပေါ့။ အပြင်စျေးနဲ့ ၃၀၀၀ လောက် ကွာတော့ အဲဒီ ၃၀၀၀ ကဆန်တစ်ပြည်ဖိုး အပိုထွက်လာတာပေါ့” ဟု စားအုန်းဆီဝယ်ယူရန် တန်းစီ‌စောင့်ဆိုင်းနေသူ တစ်ဦးက ပြောသည်။

.

လက်ရှိ တောင်ကြီးမြို့ပေါ်တွင် စားအုန်းဆီတစ်ပိသာလျှင် ပြင်ပပေါက်စျေး ၈၀၀၀ ကျပ်ခန့်ရှိပြီး မိုလ်ဘိုင်းစနစ်ဖြင့် လာရောက်ရောင်းချရာတွင် ၅၀၀၀ ကျပ်အောက်သာ ပေးဝယ်ရသည့်အတွက် အလုအယက် တန်းစီစောင့်ဆိုင်းဝယ်ယူ နေကြခြင်းဖြစ်ကြောင်း သိရသည်။

.

စစ်ကောင်စီလက်ထက်တွင် အခြေခံစားသောက်ကုန်ဈေးနှုန်းများ အဆမတန် မြင့်တက်နေသည့်အတွက် စားအုန်းဆီ အပြင် အခြားလိုအပ်သည့် စားသောက်ကုန်များအား ယခုကဲ့သို့ လာရောက်ရောင်းချပေးစေလိုကြောင်း ဒေသခံများက ပြောဆိုကြသည်။

.

စားသုံးဆီ တင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်ရေး ကော်မတီက  နိုဝင်ဘာ ၈ ရက်ကနေနိုဝင်ဘာ ၁၃ ရက်အထိ အခြေခံလက်ကားရည်ညွှန်းဈေးအဖြစ် စားအုန်းဆီ တစ်ပိဿာလျှင် ကျပ် ၄၃၃၀ ကျပ် သတ်မှတ်ထားပြီး ယခင်ရက်သတ္တပတ်ကထက် ၁၅၀ ကျပ် ဈေးနှုန်းထပ်မံမြင့်တက်လာခြင်းဖြစ်သည်။

.

ရန်ကုန်တိုင်းတွင် မြန်မာနိုင်ငံ ဆီကုန်သည်နှင့် ဆီလုပ်ငန်းရှင်များအသင်းမှ ယခုတစ်ပတ်အတွက် စားအုန်းဆီ တစ်ပိဿာလျှင် ၄၄၅၀ ကျပ်နှုန်းဖြင့် တန်းစီစနစ်ဖြင့် လိုက်လံရောင်းချပေးနေကြောင်း သိရသည်။

.