စစ်တပ်အာဏာသိမ်းပြီးနောက် ကရင်ပြည်နယ်တွင် အရပ်သားပြည်သူ သေဆုံးမှု ၃၀၀ ကျော် ရှိလာ

.

ကရင်နီ (ကယား) ပြည်နယ်တွင် ၂၀၂၁ ခုနှစ်၊ ဖေဖော်ဝါရီလ ၁ ရက်၊ စစ်ကောင်စီတပ် အာဏာသိမ်းပြီးနောက် အရပ်သားပြည်သူ သေဆုံးမှု ၃၀၀ ကျော် ရှိလာပြီဖြစ်ကြောင်း တိုးတက်သောကရင်နီပြည်သူ့အင်အားစု (PKPF) က ယနေ့ နိုဝင်ဘာလ ၁ ရက်တွင် ထုတ်ပြန်ထားသည်။

.

.

၂၀၂၁ ခုနှစ်၊ ဖေဖော်ဝါရီလ ၁ ရက်မှ ၂၀၂၂ အောက်တိုဘာလကုန်အထိ ကရင်နီပြည်နယ်တွင် စစ်ကောင်စီ၏ ဖမ်းဆီးသတ်ဖြတ်ခံရသည့် အရပ်သားပြည်သူ ၂၈၂ ဦး ရှိပြီး စစ်ဘေးရှောင်နေစဉ် သေဆုံးသူ ၉၇ ဦး ရှိလာပြီဖြစ်ကာ စစ်ဘေးရှောင်နေစဉ် သေဆုံးသူ အများစုမှာ လက်နက်ကြီး ထိမှန်ခြင်း၊ လေကြောင်းတိုက်ခိုက်မှုခံရခြင်း အပါအဝင် ဆေးဝါး မလုံလောက်ခြင်းနှင့် ဆေးဝါးကောင်းမွန်စွာ ကုသခွင့်မရခြင်းတို့ကြောင့်ဖြစ်ကြောင်း PKPF ၏ ထုတ်ပြန်ချက် တွင် ဖော်ပြထားသည်။

.

ထို့အတူ စစ်ကောင်စီတပ်က မတရားဖမ်းဆီးခံထားရသော ပြည်သူအရေအတွက်မှာလည်း ၂၈၀ ဦးထိရှိကာ လွိုင်ကော်ထောင်မှ မန္တလေးအကျဥ်းထောင်သို့ လွှဲပြောင်းခံရသူအချို့ ရှိကြောင်းလည်း သိရသည်။

.

ကရင်နီပြည်နယ်တွင် တိုက်ပွဲပေါင်း ၅၀၀ ကျော် ဖြစ်ပွားခဲ့ရာ စစ်ကောင်စီတပ်က လေကြောင်းမှ ၁၇၃ ကြိမ်ထက် မနည်း ပစ်ကူတိုက်ခိုက်ခဲ့သည်ဟု သိရသည်။

.

အဆိုပါ တိုက်ပွဲများအတွင်း စစ်ကောင်စီတပ်သား ၁၆၁၈ ဦး သေဆုံးခဲ့ပြီး စစ်ကောင်စီတပ်ကို ခုခံတိုက်ခိုက်ရာတွင် ကရင်နီတပ်မတော် (KA)၊ ကရင်နီအမျိုးသားများကာကွယ်ရေးတပ် (KNDF)နှင့် ပြည်သူ့ကာကွယ်ရေးတပ်များမှ ရဲဘော် ၁၈၃ဦး ကျဆုံးခဲ့သည်ဟု PKPF က ထုတ်ပြန်ထားသည်။

.