တောင်ကြီးမြို့ အဝေရာမီးပုံးပျံကွင်းအတွင်း ဈေးဆိုင်ခန်းများဆောက်လုပ်လာသည့်အတွက် ကွင်းပျောက်မည်ကို ဒေသခံများ စိုးရိမ်

.

တောင်ကြီးမြို့၏ အထင်ကရနေရာတစ်ခုဖြစ်သည့် အဝေရာမီးပုံးပျံကွင်းအတွင်း ဈေးဆိုင်ခန်းတွဲများ ဆောက်လုပ်ပြီး ဖွင့်လှစ်ရောင်းချနေသည့်အတွက် မီးပုံးပျံကွင်း ပျောက်သွားမည်ကို ဒေသခံပြည်သူများ စိုးရိမ်နေကြောင်း သိရသည်။

.

.

အဆိုပါဈေးဆိုင်ခန်းများအား မီးပုံးပျံကွင်း၏မြောက်ဖက် ပြည်သူ့အားကစားရင်ပြင် အရှေ့ဖက်ခြမ်းတွင် ဆောက်လုပ်ထားခြင်းဖြစ်ပြီး ဆိုင်ခန်းအရေအတွက် ရာနှင့်ချီ၍ ရှိနေကြောင်း သိရသည်။

.

“မီးပုံးပျံကွင်းထဲမှာ ဈေးဆိုင်တွေဆောက်ပြီး ရောင်းနေကြတာပါ။ အဝေရာ ယာယီပျံကျဈေး လို့ သိရပါတယ်။ ယာယီပျံကျဈေးဆိုပေမဲ့ ဆိုင်ခန်းတွေက အခိုင်အမာပုံစံမျိုးတွေ လုပ်ထားတာပေါ့။ ကွင်းအရှေ့ဖက်ခြမ်းမှာဆိုလည်း စစ်တပ်က လိုင်းခန်းတွေဆောက်ပြီး နေကြတာတွေရှိတယ်။ အခုလည်းဈေးက ထပ်တိုးလာတော့ ကြာရင် ကွင်းပျောက်သွားမှာ စိုးရိမ်ရတယ်” ဟု တောင်ကြီးဒေသခံတစ်ဦးက ပြောသည်။

.

ယခင်က မီးပုံးပျံအတွင်း မနက်ခင်း ညနေသိမ်းသည့်ပျံကျဈေးသည်များသာရှိပြီး ဆိုင်ခန်းအခိုင်အမာဖြင့် ရောင်းချသည့် ဈေးသည်များမရှိဘဲ ယခုဈေးဆိုင်ခန်းတွဲများ ဆောက်လုပ်၍ စျေးသည်များအား ရောင်းချစေခြင်းဖြစ်ကြောင်း သိရသည်။

.

“ကွင်းထဲမှာ ပျံကျရောင်းနေတဲ့ ဈေးသည်တွေကို ကွင်းဘေးနားကပ်ပြီး ဆိုင်ခန်းတွေနဲ့ ရောင်းခိုင်းတာမျိုးဆိုတော့ ဈေးသည်တွေကို ဖယ်ခိုင်းပြီး ကွင်းကို တစ်ခုလုပ်မလားဆိုတာမျိုးတော့ စိုးရိမ်ရတာပေါ့” ဟု အခြားဒေသခံတစ်ဦး ကလည်း ပြောသည်။

.

အဆိုပါဈေးဆိုင်ခန်းတွဲများ ဖွင့်လှစ်ရောင်းချနေသည်မှာ ရက်ပိုင်းမျှသာ ရှိသေးပြီး ဆိုင်ခန်းအရေအတွက် ထပ်မံတိုးမြင့် လာနိုင်ခြင်း ရှိ/မရှိ မသိရှိရသေးချေ။

.