နိုင်ငံတကာအားနှင့် ပြည်တွင်းအားကို လိုက်လျောညီထွေဖြစ်အောင် ချိတ်ဆက်ဆောင်ရွက်ရန် ယာယီသမ္မတ တိုက်တွန်း

.

နိုင်ငံတကာ၏ အားနှင့် ပြည်တွင်းအားကို လိုက်လျောညီထွေဖြစ်အောင် ချိတ်ဆက်ဆောင်ရွက်ရန် ယာယီသမ္မတ ဒူဝါလရှီးလ က တိုက်တွန်းပြောဆိုခဲ့သည်ဟု သိရသည်။

.

.

အမျိုးသားညီညွတ်ရေးအစိုးရ၏ ၇၆ ကြိမ်မြောက် အစိုးရအဖွဲ့ အစည်းအဝေးကို ယနေ့ နိုဝင်ဘာလ ၂၉ ရက်၊ နံနက်ပိုင်းက ပြုလုပ်ရာ အစည်းအဝေးတွင် ယာယီသမ္မတက ယင်းကဲ့သို့ တိုက်တွန်းပြောဆိုခဲ့ခြင်းဖြစ်သည်။

.

ယာယီသမ္မတ ဒူဝါလရှီးလက နိုင်ငံတကာ၏ အားနှင့် ပြည်တွင်းအားကို လိုက်လျောညီထွေဖြစ်အောင် ချိတ်ဆက် လုပ်ဆောင်ရေးသည် အမျိုးသားညီညွတ်ရေးအစိုးရအဖွဲ့ဝင်အားလုံးတွင် တာဝန်ရှိကြောင်း၊ အထူးသဖြင့် နိုင်ငံခြားရေး ဝန်ကြီးဌာနသည် နိုင်ငံတကာအသိုက်အဝန်း၏ သဘောထား အခြေအနေကို လက်တွေ့ကျကျ သိမြင်နားလည်ထားပြီး ကတ်ဘိနက် အဖွဲ့ဝင်များနှင့် ချိတ်ဆက်ကာ အချိန်နှင့်တပြေးညီ ဆောင်ရွက်ကြရန် တိုက်တွန်းပြောဆိုခဲ့သည်။

.

ထို့အပြင် ပြည်တွင်း/ပြည်ပရောက် မြန်မာနိုင်ငံသားများသည် နွေဦးတော်လှန်ရေး နဂိုမူလထောက်ပံ့ရေး အရင်းအမြစ် များ ဖြစ်ကြောင်း၊ ပြည်သူလူထု ထောက်ခံမှုမရှိသည့် အစိုးရများသည် ရေရှည်ရပ်တည်ရန် ခက်ခဲကြောင်း၊ NUG အနေနဲ့ ပြည်သူလူထုထောက်ခံမှု မြင့်မားအောင်လုပ်ဆောင်ရန် လိုအပ်ကြောင်း၊ လူထုထောက်ခံစေချင်ဇောဖြင့် လက်တွေ့နှင့် ကင်းကွာသည့် မျှော်လင့်ချက်များကို အထိန်းအကွပ်မဲ့ ပြောဆိုလုပ်ဆောင်မှုများကို တက်နိုင်သမျှ ထိန်းသိမ်းရန် လိုအပ်ကြောင်း ၎င်းက ဆက်လက်ပြောဆိုခဲ့သည်။

.

ဆက်လက်ပြီး ပြည်‌ထောင်စုဝန်ကြီးချုပ် မန်းဝင်းခိုင်သန်းက အမှာစကား ပြောကြားကာ နိုင်ငံခြားရေးဝန်ကြီးဌာနက IACC လုပ်ငန်းအဖွဲ့မှ International Donor များနှင့် တွေ့ဆုံရန် ပြင်ဆင်ထားမှုများကို ဆွေးနွေးတင်ပြခဲ့ပြီး ပြည်ထောင်စုဝန်ကြီးချုပ်က ပြန်လည်ရှင်းလင်းဆွေးနွေးကာ ယာယီသမ္မတက နိဂုံးချုပ်အမှာစကား ပြောကြားခဲ့ ကြောင်း သိရသည်။

.

အဆိုပါ အမျိုးသားညီညွတ်ရေးအစိုးရ၏ ၇၆ ကြိမ်မြောက် ပုံမှန်အစည်းအဝေးသို့ ယာယီသမ္မတ ဒူဝါလရှီးလ၊ ပြည်ထောင်စုဝန်ကြီးချုပ် မန်းဝင်းခိုင်သန်းနှင့် ပြည်ထောင်စုဝန်ကြီးများ၊ ဒုတိယဝန်ကြီးများ တက်ရောက်ခဲ့ကြောင်း သိရသည်။

.