တောင်ကြီးမြို့နယ်အုပ်ချုပ်ရေးမှူးနေအိမ် အနုကြမ်းစီးခံရ

.

တောင်ကြီးမြို့၊ သစ်တောရပ်ကွက်ရှိ စစ်ကောင်စီခန့် မြို့နယ်အုပ်ချုပ်ရေးမှူး ဦးအောင်ဆွေမြင့်၏ နေအိမ်တွင် ယမန်နေ့ နိုဝင်ဘာလ ၁ ရက်၊ ညနေပိုင်းက ဓါးထောက် အနုကြမ်းစီးခံရမှု ဖြစ်ပွားခဲ့ကြောင်း သိရသည်။

.

.

သစ်တောရပ်ကွက်၊ အရှေ့မြို့ပတ်လမ်းနှင့် သပြေလမ်းထောင့်ရှိ မြို့နယ်အုပ်ချုပ်ရေးမှူး၏ နေအိမ်တွင် အမည်မသိသူ တစ်ဦးမှ နေအိမ်အတွင်း ဝင်ရောက်လာပြီး‌နောက် အိမ်အကူအား ဓါးဖြင့် ထိုးပြီး ဘုရားစင်ပေါ်ရှိ ငွေ ၅ သိန်းကျပ်ခန့်ကို ယူဆောင်သွားခဲ့ခြင်းဖြစ်ကြောင်း သိရသည်။

.

“ဒဏ်ရာတော့ သိပ်မများပါဘူး။ အိမ်ဖော်က တွေ့လို့ ဖုန်းဆက်မယ်လုပ်တော့ ဖုန်း မဆက်နဲ့ ဆိုပြီး ဓါးနဲ့ ထိုးသွား တာပါ။ ဘုရားစင်ပေါ် တင်ထားတဲ့ ပိုက်ဆံ ၅ သိန်းလောက်တော့ ပါသွားပါတယ်” ဟု သတင်းရင်းမြစ်တစ်ဦးက ပြောသည်။

.

အဆိုပါ သတင်းနှင့် ပတ်သက်၍ စစ်ကောင်စီဘက်က ဖုံးဖိရန် ကြိုးစားနေပြီး လုယက်သူကို စုံစမ်းဖော်ထုတ်လျက် ရှိကြောင်း သိရသည်။

.

စစ်ကောင်စီ အာဏာသိမ်းပြီးနောက်ပိုင်း တောင်ကြီးမြို့ပေါ်တွင် ခိုးဆိုးလုယက်မှုများ များပြားလာနေပြီး ယခုကဲ့သို့ မြို့နယ်အုပ်ချုပ်ရေးမှူး နေအိမ်ကို ဝင်ရောက်လုယက်ခြင်းမှာ ပထမဆုံးအကြိမ် ဖြစ်ကြောင်း သိရသည်။

.