သူရ ဦးရွှေမန်း၏ ပြည်ထောင်စုကောင်းကျိုးဆောင်ပါတီ(UBP) ကို နိုင်ငံရေးပါတီအဖြစ် မှတ်ပုံတင်ထားခြင်းမှ အောက်တိုဘာလ ၂၇ ရက်က စ၍ ပယ်ဖျက်ခွင့်ပြုလိုက်ကြောင်း အာဏာသိမ်း စစ်ကောင်စီ၏ ရွေးကောက်ပွဲကော်မရှင် (UEC)က ထုတ်ပြန်ခဲ့သည်။
.
ပါတီကို ဦးဆောင် ဖွဲ့စည်းခဲ့သည့် ခေါင်းဆောင်များမှာ အသက်အရွယ် ကြီးရင့်လာပြီး ကျန်းမာရေးချို့တဲ့သည့်အပြင် လူမှုရေး နှင့် အခြား အခက်အခဲများရှိလာခြင်းကြောင့် ပါတီနိုင်ငံရေး ဆက်လက် လုပ်ကိုင်ရန် ဆန္ဒမရှိကြတော့သည့်အတွက် ပါတီ၏ ဗဟိုအလုပ်အမှုဆောင်များ၏ သဘောတူညီချက်ဖြင့် ဖျက်သိမ်းရန် ဆုံးဖြတ်ကြခြင်း ဖြစ်ကြောင်း သူရဦးရွှေမန်းက အောက်တိုဘာလ ၁၂ ရက်တွင် ပြောဆိုထားသည်။
.
ပြည်ထောင်စုကောင်းကျိုးဆောင်ပါတီ(UBP) ကို ၂၀၁၉ ခုနှစ်၊ ဧပြီလက စတင် တည်ထောင်ခဲ့ခြင်း ဖြစ်ပြီး ၂၀၂၀ အထွေထွေရွေးကောက်ပွဲ၌ လွှတ်တော်ကိုယ်စားလှယ်လောင်း ၉၂၇ ဦးဖြင့် မဲဆန္ဒနယ်အသီးသီးတွင် ဝင်ရောက် ယှဉ်ပြိုင်ခဲ့သော်လည်း တစ်နေရာမှ အနိုင်ရရှိခဲ့ခြင်း မရှိသည့် ပါတီလည်း ဖြစ်သည်။
