KIO အနေဖြင့် နိုင်ငံရေးအရွေ့တစ်ခုကို ဖော်ဆောင်သွားမည်ဖြစ်ကြောင်း ဗိုလ်ချုပ်ကြီး အင်ဘန်လ ပြောကြား

.

ကချင်လွတ်မြောက်ရေးအစည်းအရုံး (KIO) ဗဟိုကော်မတီ အနေဖြင့် မကြာမီကာလအတွင်း နိုင်ငံရေးအရွေ့ တစ်ခုသို့ ဖော်ဆောင်သွားမည်ဖြစ်ပြီး KIO ပါတီဝင်များ၊ ပြည်သူများနှင့် KIO ဝန်ထမ်းများအားလုံး အားသွန်ခွန်စိုက် ပါဝင်သွား ကြရန် တိုက်တွန်းလိုကြောင်း KIO ဥက္ကဋ္ဌ ဗိုလ်ချုပ်ကြီး အင်ဘန်လ က ပြောဆိုခဲ့သည်ဟု သိရသည်။

.

.

ယနေ့ အောက်တိုဘာလ ၂၅ ရက်တွင် ကျရောက်သည့် KIO တည်ထောင်ခြင်း ၆၂ နှစ်မြောက်နေ့ မိန့်ခွန်း ပြောကြားရာတွင် ဗိုလ်ချုပ်ကြီး အင်ဘန်လက ယင်းကဲ့သို့ ထည့်သွင်းပြောဆိုခဲ့ခြင်းဖြစ်သည်။

.

ပင်လုံစာချုပ်သည် ၁၉၄၇ ဖွဲ့စည်းပုံဥပဒေ၏ လွမ်းမိုးချေဖျက်ခြင်းကိုခံရသည့်အတွက် တိုင်းရင်းသားလူမျိုးများ တော်လှန်လာရခြင်းဖြစ်ပြီး နိုင်ငံတော်၏ အချုပ်အခြာအာဏာကို စစ်တပ်က ထာဝရ ဦးဆောင်ချုပ်ကိုင်သွားမည့် စစ်အာဏာရှင်စနစ်ကြောင့် ပြည်တွင်းစစ်ကို ပိုမိုတောက်လောင်စေကာ တစ်နိုင်ငံလုံး အဖက်ဖက်၌ ဆင်းရဲကြပ်တည်း ခက်ခဲစေခဲ့ကြောင်း ဗိုလ်ချုပ်ကြီး အင်ဘန်လက ဆိုသည်။

.

ထို့အပြင် ၂၀၂၁ ခုနှစ် ဖေဖေါ်ဝါရီလ ၁ ရက် စစ်အာဏာသိမ်းမှုကြောင့် တနိုင်ငံလုံး၌ ရှုပ်ထွေးကြပ်တည်းသည့် အခင်းအကျင်းသို့ ဆိုက်ရောက်သွားပြီး ဆင်းရဲဒုက္ခများနှင့် ကြုံတွေ့နေရသော်လည်း အခြားတစ်ဖက်၌ ထွက်ရှိလာ သော အဖြေတစ်ခုမှာ အာဏာရှင်စနစ်ကို ချေမှုန်းတိုက်ဖျက်ပစ်ရမည်ဆိုသည့် အချက်ဖြစ်ပြီး ၎င်းလုပ်ဆောင်ချက်တွင် KIO လည်း ဖြစ်နိုင် သော နည်းလမ်းများဖြင့် ပါဝင်ရမည်၊ တာဝန်ယူရမည်၊ ဦးဆောင်ရမည်ဟု ၎င်းက ဆိုသည်။

.

KIO သည် မည်သို့သော စစ်ရေးနှင့် နိုင်ငံရေး မုန်တိုင်းကြီးများကိုမဆို ဖြတ်ကျော်နိုင်ခဲ့သလို KIO ခေါင်းဆောင် အဆက်ဆက်က မိမိတို့ KIO ၏ မူလနိုင်ငံရေးလမ်းစဉ်နှင့် သွေဖယ်သွားခြင်းမရှိဘဲ ခိုင်ခိုင်မာမား ရပ်တည်ကာ ဦးဆောင်လာခဲ့၍ KIO သည် ပြည်သူလူထုကို ကိုယ်စားပြုသည့် အဖွဲ့အစည်းအဖြစ် ဖြစ်တည်နေပြီဖြစ်ကြောင်း ဗိုလ်ချုပ်ကြီး အင်ဘန်လက ပြောဆိုခဲ့သည်။

.