.
ကချင်လွတ်မြောက်ရေးအဖွဲ့ (KIO) ထိန်းချုပ်ရာနေရာတွင် နှစ်ပတ်လည်နေ့အခမ်းအနား
ကျင်းပနေစဉ် စစ်ကောင်စီ တပ်က ဗုံးကြဲတိုက်ခိုက်မှုသည် လူသားမျိုးနွယ်စုအပေါ် ကျူးလွန်မှုနှင့်
စစ်ရာဇဝတ်မှု မြောက်ကြောင်း ကုလသမဂ္ဂ ဆိုင်ရာ
မြန်မာအမြဲတမ်းကိုယ်စားလှယ် သံအမတ်ကြီး ဦးကျောမိုးထွန်းက ကုလသမဂ္ဂအစည်းအဝေးတွင်
တင်ပြ ပြောဆိုခဲ့သည်ဟု သိရသည်။
.
.
(၇၇) ကြိမ်မြောက် ကုလသမဂ္ဂအထွေထွေညီလာခံ၊
ပထမကော်မတီ (လက်နက်ဖျက်သိမ်းရေးနဲ့ နိုင်ငံတကာလုံခြုံရေး ကော်မတီ၏ ဘာသာရပ်ဆိုင်ရာဆွေးနွေးမှုအစီအစဉ်ကို အောက်တိုဘာ ၂၄ ရက်က ပြုလုပ်ရာတွင် သံအမတ်ကြီးက ယင်းကဲ့သို့ တင်ပြပြောဆိုခဲ့ခြင်းဖြစ်ကြောင်း သိရသည်။
.
စစ်ကောင်စီတပ်သည် အောက်တိုဘာလ ၂၃ ရက်က KIO ၆၂ နှစ်မြောက် နှစ်ပတ်လည်နေ့
တေးဂီတဖျော်ဖြေပွဲ ကျင်းပရာ နေရာကို လေကြောင်းမှ ဗုံးကြဲတိုက်ခိုက်ခဲ့သည့်အတွက် အနုပညာရှင်များ၊
အမျိုးသမီးနှင့် ကလေးသူငယ် အပ်အဝင် လူပေါင်း ၈၀ ကျော် သေဆုံးခဲ့ခြင်းဖြစ်သည်။
.
သံအမတ်ကြီး ဦးကျော်မိုးထွန်းက စစ်ကောင်စီသည် အာဏာသိမ်းပြီးနောက်ပိုင်း
လပေါင်း ၂၀ အတွင်း ပြည်သူများ အပေါ် လေကြောင်းတိုက်ခိုက်မှု အကြိမ် ၂၄၀ ကျော် ပြုလုပ်ခဲ့ကြောင်း၊
စစ်ကောင်စီတပ်အနေဖြင့် လက်နက်နှင့် ဆက်စပ်နည်းပညာများ ဆက်လက်ရရှိနေပါက မြန်မာပြည်သူများနှင့်
ကလေးသူငယ်များအပေါ် လူမဆန်သည့် တိုက်ခိုက်သတ်ဖြတ်မှုများကို ဆက်လက်ကျူးလွန်နေမည်ဖြစ်ကြောင်း၊
မြန်မာပြည်သူများကို ကယ်တင်ပေးနိုင်ရန် အတွက် စစ်ကောင်စီတပ်အား လက်နက်တင်ပို့ရောင်းချမှုများကိုချက်ချင်းရပ်တန့်ပေးရန်
တိုက်တွန်းပါကြောင်း ဆက်လက်ပြောဆိုခဲ့သည်။
.
KIO ထိန်းချုပ်နယ်မြေအား လေကြောင်းတိုက်ခိုက်မှုမှာ နယ်မြေတည်ငြိမ်ရေးနှင့်
ငြိမ်းချမ်းရေးအတွက် ဂျနီဗာကွန်ဗင်းရှင်းနှင့်အညီ စစ်ရေးတန်ပြန်ခြင်းသာဖြစ်ပြီး
KIO တပ်မဟာမှူး၊ ဒုတပ်မဟာမှူး၊ တိုက်နယ်မှူး အပါအဝင် KIA နှင့် PDF များသာ သေဆုံးခဲ့သည်ဟု
စစ်ကောင်စီက သတင်းထုတ်ပြန်ထားသော်လည်း KIO ၆၂ နှစ်မြောက် အခမ်းအနား ဖျော်ဖြေရေးပြုလုပ်နေစဉ်
တိုက်ခိုက်ခံရမှုကြောင့် ကချင်အနုပညာရှင်များ၊ အရပ်သားများ သေဆုံးခဲ့သည်ဟု KIO က ပြောဆိုထားသည်။
.
