ICJ တွင် စစ်ကောင်စီ၏ ကန့်ကွက်ချက်များကို ကြားနာရန်မလိုဟု သံအမတ်ကြီးဦးကျော်မိုးထွန်း UN ညီလာခံတွင် တင်ပြ

.

အပြည်ပြည်ဆိုင်ရာတရားရုံး (ICJ) အနေဖြင့် စစ်ကောင်စီ၏ ကန့်ကွက်ချက်များကို ကြားနာရန်ပင် မလိုအပ်ကြောင်း ကုလသမဂ္ဂ အမြဲတမ်းသံအမတ်ကြီး ဦးကျော်မိုးထွန်းက ကုလသမဂ္ဂအထွေထွေညီလာခံ၊ မျက်နှာစုံညီအစည်းအဝေး တွင် တင်ပြပြောဆိုခဲ့သည်ဟု သိရသည်။

.

.

ICJ ၏ ဆုံးဖြတ်ချက်သည် ၂၀၁၆ နှင့် ၂၀၁၇ ခုနှစ်များတွင် ရိုဟင်ဂျာများကို ဦးတည်ခဲ့သည့် ရက်စက်ကြမ်းကြုတ်မှုများ အပေါ် ခိုင်မာသည့် ကြားနာစစ်ဆေးမှုများ ဆောင်ရွက်နိုင်ရန် လမ်းရှင်းပေးလိုက်ခြင်းဖြစ်ပြီး စစ်ကောင်စီ၏ ကန့်ကွက်ချက်များကို ကြားနာရန်ပင် မလိုအပ်ကြောင်း သံအမတ်ကြီး ဦးကျော်မိုးထွန်းက နယူးယောက်တွင် ကျင်းပ နေသည့် ၇၇ ကြိမ်မြောက် ကုလသမဂ္ဂအထွေထွေညီလာခံ၊ မျက်နှာစုံညီအစည်းအဝေးတွင် တင်ပြပြောဆိုခဲ့ခြင်း ဖြစ်သည်။

.

အဆိုပါအမှုနှင့် ပတ်သက်၍ အမျိုးသားညီညွတ်ရေးအစိုးရ (NUG) အနေဖြင့် ကနဦးကန့်ကွက်ချက်များ အားလုံးကို ရုတ်သိမ်းကြောင်းနှင့် တရားရုံး စီရင်ဆုံးဖြတ်ချက်များကို လက်ခံမည်ဖြစ်ကြောင်း ဖေဖော်ဝါရီလ ၁၀ ရက်တွင် ICJ သို့ တရားဝင် အကြောင်းကြားခဲ့ပြီး ICJ နှင့် အပြည့်အဝ ပူးပေါင်းဆောင်ရွက်သွားမည်ဖြစ်ကြောင်း ဦးကျော်မိုးထွန်းက ထပ်လောင်း ပြောဆိုခဲ့သည်။

.

ထို့အပြင် သံအမတ်ကြီးက စစ်ကောင်စီတပ်၏ လူထုအပေါ် ကျူးလွန်မှုများနှင့် ပတ်သက်၍ ကချင်ပြည်နယ်၊ ဖားကန့် အနန့်ပါဒေသ လေကြောင်းတိုက်ခိုက်မှုနှင့် စစ်ကိုင်းတိုင်း၊ ဒီပဲယင်း လက်ယက်ကုန်းကျေးရွာ စာသင်ကျောင်းတို့အား လေကြောင်းတိုက်ခိုက်မှုများကို ကိုးကား၍ တင်ပြခဲ့သည်ဟု သိရသည်။

.

အပြည်ပြည်ဆိုင်ရာတရားရုံး (ICJ) တွင် ဂမ်ဘီယာနိုင်ငံက မြန်မာနိုင်ငံကို လူမျိုးသုဉ်း သတ်ဖြတ်မှု စွပ်စွဲချက်ဖြင့် စွဲဆို ထားသည့်အမှုနှင့် ပတ်သက်၍ တရားရုံးက လက်ခံသင့်၊ မသင့်ကို မြန်မာဘက်က ကနဦး ကန့်ကွက်ချက်တင်ထားခြင်း ကို တရားရုံးက ပယ်ချကြောင်း ဇူလိုင်လ ၂၂ ရက်တွင် ဆုံးဖြတ်ထားသည်။

.