အကျဉ်းသားများအတွက် ထောင်ဝင်စာ ပို့ခွင့် ပြန်ရ

.

ညောင်ရွှေအကျဉ်းထောင်(တောင်လေးလုံး)ထောင် အပါအဝင် နိုင်ငံတစ်ဝန်းရှိ အကျဉ်းထောင် အသီးသီးရှိ အကျဉ်းသားများအတွက် ထောင်ဝင်စာ ပို့ခွင့် ယနေ့ အောက်တိုဘာလ ၃၁ ရက်တွင် ပြန်လည် ရရှိပြီ ဖြစ်ကြောင်း သိရသည်။

.

.

ထို့အတူ ထောင်တွင်း အထူးတရားရုံးများကိုလည်း ယနေ့မှစ၍ ပြန်လည် ဖွင့်လှစ်ပြီ ဖြစ်သည်ဟု သိရသည်။

.

ယင်းကဲ့သို့ ထောင်ဝင်စာပို့ခွင့် ပြန်လည် ရရှိပြီ ဖြစ်သော်လည်း အကန့်အသတ်များ ရှိနေသည့်အတွက် အကျဉ်းသား များနှင့် သက်ဆိုင်ရာမိသားစုဝင်များအတွက် အခက်အခဲများ ဖြစ်လာနိုင်သည်ဟု သတင်းရင်းမြစ်တစ်ဦးက ဆိုသည်။

.

“ဒီနေ့ ထောင်ဝင်စာ ပြန်ပို့လို့ရပြီ။ ထောင်ကျသူရဲ့အမည်၊ အဖေအမည်။ ပို့တဲ့လူရဲ့ အမည်၊ နေရပ်လိပ်စာ အပြည့်အစုံ ပေးရပါတယ်။ အိမ်ထောင်စုဇယားလည်း ယူသွားရပါတယ်။ မိသားစုဝင်ထဲကပဲ ပို့လို့ရတဲ့အတွက် အရင်လို လမ်းကြုံ တွေ ယူသွားပေးလို့ မရပါဘူး။ သွားလာရ ခက်တဲ့လူတွေအတွက်တော့ တော်တော်ဒုက္ခရောက်ပါမယ်” ဟု သတင်းရင်းမြစ်က ပြောသည်။

.

နိုင်ငံရေးအကျဉ်းသားများ အပါအဝင် အကျဉ်းကျနေသူ အများစုသည် ထောင်မှကျွေးသည့် အစားအသောက် မကောင်း၍ ထောင်ဝင်စာကိုသာ အားထားနေသည်ဟု ၎င်းက ဆက်လက် ပြောဆိုသည်။

.

ရန်ကုန်မြို့ အင်းစိန်အကျဉ်းထောင်၌ အောက်တိုဘာ ၁၉ ရက်က ပေါက်ကွဲမှုဖြစ်ပြီး နောက်ပိုင်း ပိတ်ထားခဲ့သည့် ထောင်တွင်း အထူးတရားရုံးနှင့် ထောင်ဝင်စာပို့ခွင့်ကို စစ်ကောင်စီက ပြန်ဖွင့်‌ပေးခြင်းဖြစ်ကြောင်း သိရသည်။

.