.
ရခိုင်ပြည်နယ်၊ ကျောက်တော်မြို့နယ်တွင်
ယမန်နေ့ စက်တင်ဘာလ ၁၅ ရက်၊ နေ့လယ်ပိုင်းက ဝါးရောင်းရန် လာရောက်သည့် စက်လှေတစ်စီးကို
စစ်ကောင်စီတပ်က သေနတ်ဖြင့် ပစ်ခတ်သဖြင့် တစ်ဦး ဒဏ်ရာရရှိခဲ့ကြောင်း သိရသည်။
.
ဒဏ်ရာရရှိသူမှာ ကျောက်တော်မြို့နယ်၊
လောင်းရှည်ကျေးရွာနေ ဦးဇော်မင်းဦး ဆိုသူဖြစ်ပြီး ဦးခေါင်းတွင် သေနတ် ကျည် ထိမှန်ခဲ့ကာ
၎င်းနှင့်အတူ တစ်ရွာတည်းနေ ဦးသင်္ခါကျော်၊ ဒေါ်သန်း ယဉ်နု၊ ဒေါ်မသန်းရီတို့က ဝါးရောင်းရန်
အတွက် ကျောက်တော်မြို့သို့ လာရောက်စဉ် မျောက်တောင်ကျေးရွာအရောက်တွင် ပစ်ခတ်ခံရခြင်းဖြစ်ကြောင်း
သိရသည်။
.
မျောက်တောင်ကျေးရွာတွင်
တပ်စွဲထားသည့် စစ်ကောင်စီတပ်က ၎င်းတို့ စီးနင်းလာသည့် စက်လှေကို ရပ်ခိုင်းရာ စက်လှေသံကြောင်း
မကြားသည့်အတွက် ဆက်သွားရာတွင် ပစ်ခတ်ခဲ့ခြင်းဖြစ်ကြောင်း ဒေသခံတစ်ဦးက ဆိုသည်။
.
ထို့အပြင် အဆိုပါ စစ်ကောင်စီတပ်စခန်းမှ
တပ်သားများသည် စက်လှေများ၊ ဘုတ်များကို မကြာခဏ ပစ်ခတ်မှုများ ပြုလုပ်နေသည့်အတွက် ခရီးသွားများ
အသက်အန္တရာယ် စိုးရိမ်နေရကြောင်း ဒေသခံတစ်ဦးက ပြောသည်။
.
ပြီးခဲ့တဲ့ ၂၀၂၀ ပြည့်နှစ်၊
ဖေဖော်ဝါရီ ၂၇ ရက်ကလည်း ပလက်ဝမြို့မှ ကျောက်တော်မြို့သို့ ဈေးဝယ်ရန် လာရောက် သည့် စက်လှေတစ်စီးကို
စစ်ကောင်စီတပ်က လက်နက်ကြီးဖြင့် ပစ်ခတ်ခဲ့သဖြင့် စက်လှေပေါ်ပါ ခရီးသည် ၄ ဦး ထိခိုက်ဒဏ်ရာရရှိမှု
ဖြစ်ပွားခဲ့ဖူးကြောင်း သိရသည်။
.
