.
တောင်ကြီးမြို့နှင့်
အေးသာယာစက်မှုဇုန်ကို ဆက်သွယ်ဖောက်လုပ်ထားသည့် တောင်ကြီး မြို့ရှောင်လမ်းသစ်တွင် ကုန်တင်ယာဉ်ကြီးများ
သွားလာရန်မဖြစ်နိုင်သေးဘဲ အိမ်စီးကားနှင့် ယာဉ်ငယ်အချို့သာ သွားလာနိုင်သေးကြောင်း သိရသည်။
.
အဆိုပါ မြို့ရှောင်လမ်းသစ်အား
တောင်ကြီးမြို့ပေါ်နေထိုင်သူများ သွားလာရန် အသုံးပြုမည် ဆိုပါက ကျောင်းကြီးစု ရပ်ကွက်၊
ဖရဲငွေတောင်ရပ်အတွင်းမှ ဖြတ်သန်း၍ လယ်ငယ်ကျေးရွာအဝင် ဆိုင်းဘုတ်အနီးရှိ လမ်းမပေါ်မှတစ်ဆင့်
သွားရောက်နိုင်မည်ဖြစ်သည်။
.
“လမ်းက ပြီးထားတာသိပ်မကြာသေးတော့
တောင်ကြီးမြို့ပေါ်က လူတွေတောင် သိပ်မသိကြ သေးဘူး။ တောင်ကြီးက လူတွေ အဲဒီလမ်း အသုံးပြုမယ်ဆိုရင်
ဖရဲရပ်ကွက်ထဲကနေ ဖြတ်ပြီးသွားရတာပေါ့။ ရပ်ကွက်လမ်းက ကျဉ်းတော့ ကုန်တင်ကားကြီးတွေဆိုရင်
ဒီလမ်းသုံးလို့ အဆင်မပြေနိုင်သေးဘူး။ အိမ်စီးကားတွေလောက်ပဲ သွားလို့ရတယ်” ဟု
ဒေသခံတစ်ဦး ကပြောသည်။
.
ထို့အပြင် ယင်း ဖရဲအတက်လမ်းမှာ
အချို့နေရာတွင် ဆိုးရွားစွာ ပျက်စီးနေသဖြင့် ပြန်လည်ပြုပြင်ရန် လိုအပ်နေ ကြောင်း ဒေသခံများက
ဆိုသည်။
.
မြို့ရှောင်လမ်းအသုံးပြုသူများအနေဖြင့်
တောင်ကြီးမြို့အဝင်ဆိုင်းဘုတ်မှ ဆင်တောင်ကျေးရွာ၊ ညို့မီးကျေးရွာ ဖရဲရပ်ကွက်၊
ကံကြီးရပ်ကွက်နှင့် အေးသာယာစက်မှုဇုန် မှတစ်ဆင့် ရွှေညောင်မြို့ ဘက်သို့ သွားရောက်နိုင်ကြောင်း
သိရသည်။
.
အေးသာယာမှ တောင်ကြီးမြို့သို့
လာရောက်မည်ဆိုပါက ယခင်လမ်းဟောင်းအပြင် ပလီလင်းကျေးရွာ ဘက်မှလည်း လာရောက်နိုင်ပြီး
ယခုဖောက်လုပ်ထားသည့် မြို့ရှောင်လမ်းသစ်ကိုလည်း အသုံးပြုနိုင်ကြောင်း သိရသည်။
.
