တောင်ကြီးတွင် တရုတ်နိုင်ငံထုတ် လျှပ်စစ်မီးဆိုင်းကြိုးများ ဝယ်ယူသူ မရှိသလောက်ဖြစ်လာ

.

သီတင်းကျွတ် အခါသမယသို့ ရောက်ရှိလာသော်လည်း မြို့တော် တောင်ကြီးတွင် သီတင်းကျွတ်ကာလ ဘုရားမီး ပူဇော်သည့် ရောင်စုံ လျှပ်စစ် မီးကြိုး၊ မီးဆိုင်းများ အရောင်းအဝယ် ပါးနေကြောင်း လျှပ်စစ်ပစ္စည်း အရောင်းဆိုင်များ ထံက သိရသည်။

.

.

တရုတ်နိုင်ငံ၏ မြန်မာ့အရေး မူဝါဒများကြောင့် တရုတ်နိုင်ငံထုတ် ရောင်စုံ လျှပ်စစ်မီးဆိုင်းများမှာ မရောင်းရလောက် ဖြစ်နေကြောင်း လျှပ်စစ်ပစ္စည်း အရောင်းဆိုင် များက ဆိုသည်။

.

“အရင်နှစ်က ရောင်းအားနဲ့ယှဉ်ရင် တော်တော်လေးကို ကျသွားပါတယ်။ အများစုက တရုတ်ထုတ် ရောင်စုံမီးကြိုး တွေကို မသုံးကြတော့ဘူး။ ကျွန်တော်တို့ အရင်နှစ် လက်ကျန်တွေတောင် ရောင်းမကုန်ပါဘူး။ အသစ်တော့ လုံးဝ မယူတော့ဘူး” ဟု တောင်ကြီးမြို့ပေါ်ရှိ လျှပ်စစ်ပစ္စည်းအရောင်းဆိုင်တစ်ခုမှ ဆိုင်ရှင်က ပြောသည်။

.

ပြီးခဲ့သည့် ၂၀၂၀ ခုနှစ်နှင့် ရှေ့ပိုင်း ကာလများတွင် သီတင်းကျွတ်ကာလများ၌ ရောင်စုံ လျှပ်စစ်မီးကြိုး၊ မီးဆိုင်းများ ရောင်းအားကောင်းခဲ့သော်လည်း စစ်အာဏာသိမ်းပြီးနောက်ပိုင်း ၂၀၂၁ ခုနှစ်မှ စတင်၍ အရောင်းအဝယ် ပါးနေခြင်း ဖြစ်ကာ ယခု ၂၀၂၂ ခုနှစ်တွင် လုံးဝ မရောင်းရသလောက် ဖြစ်နေကြောင်း ၎င်းက ပြောသည်။

.

တရုတ်နိုင်ငံအနေဖြင့် မြန်မာပြည်သူများ၏ အခက်အခဲ၊ အကြပ်အတည်းများနှင့် ပတ်သက်၍ တစ်စုံတစ်ရာ ကူညီ ဆောင်ရွက်ပေးခြင်း မရှိသည့်အပြင် စစ်ကောင်စီနှင့် ဆက်စပ်၍ စီးပွားရေးလုပ်ငန်းများ လုပ်ကိုင်နေသည့်အတွက် ပြည်သူများက တရုတ် စီးပွားရေးလုပ်ငန်းများကို သပိတ်မှောက် ဆန္ဒပြနေကြခြင်းဖြစ်ကြောင်း သိရသည်။

.\