ပေါက်တောမြို့နယ်၊ ဆင်တက်မော်ကျေးရွာတွင် မုန်တိုင်းအရှိန်ကြောင့် ရေတက်လာသဖြင့် ဒေသခံများကို ဘေးလွတ်ရာသို့ ပြောင်းရွှေ့

.

ရခိုင်ပြည်နယ်၊ ပေါက်တောမြို့နယ်တွင် ယနေ့ အောက်တိုဘာလ ၂၄ ရက်၊ နံနက်ပိုင်းက မုန်တိုင်းအရှိန်ကြောင့် ရေတက်လာပြီး ကမ်းခြေအနီးရှိ လူနေအိမ်နှင့် ဆိုင်ခန်းအချို့ ပျက်စီးခဲ့သည့်အတွက် ဒေသခံကျေးရွာသားများကို ဘေးလွတ်ရာသို့ ပြောင်းရွှေ့ပေးထားရကြောင်း သိရသည်။

.

.

ကမ်းခြေရှိ နေအိမ်များမှာ လေအရှိန်ကြောင့် အမိုးများ ပျက်စီးသွားပြီး ရေကြီးနေသဖြင့် ဘုန်းကြီးကျောင်းနှင့် ကုန်းမြင့် နေရာများသို့ တိမ်းရှောင်နေရကြောင်း သိရသည်။

.

အဆိုပါ ဆင်တက်မော်ကျေးရွာတွင် ဒီရေတိုက်စား၍ ကမ်းပါးများ ပြိုကျသည့်အတွက် ကမ်းထိန်းနံရံကျောက်တန်း ပျက်စီးကာ ရေထဲနစ်မြုပ်နေပြီး စိုးရိမ်ရသည့် အခြေအနေတွင် ရှိနေကြောင်း သိရသည်။

.

ထို့အပြင် မုန်တိုင်းအရှိန်ကြောင့် ဒီရေတက်ပြီး၊ လိူင်းကြီး၍ လေထန်ကာ စိုးရိမ်ရသည့် အခြေအနေများရှိနေ၍ စက်လှေများကို ချောင်းအတွင်းသို့ သွင်းထားရပြီး အနီးအနားရှိ ကျေးရွာ ၁၄ ရွာ၊ တစ်အုပ်စုလုံးအား အန္တရာယ်မဖြစ်ရအောင် သတိပေးမှုများ ပြုလုပ်ထားသည်ဟု သိရသည်။

.

ဘင်္ဂလားပင်လယ်အော် အရှေ့အလယ်ပိုင်းတွင် ဖြစ်ပေါ်နေသော ဆိုင်ကလုန်းမုန်တိုင်း စီတရန် မုန်တိုင်း အန္တရာယ်ကြောင့် ရခိုင်ကမ်းရိုးတမ်း တစ်လျှောက်ရှိ ငါးဖမ်းစက်လှေများနှင့် ပြည်တွင်း ရေကြောင်း ခရီးစဉ်များကို လာမည့် အောက်တိုဘာ ၂၅ ရက်အထိ ယာယီရပ်နားထားကြောင်း သိရသည်။

.