တောင်ကြီးတွင် ဧည့်စာရင်းတိုင်သူနှင့် အိမ်ငှားစာချုပ် ပြုလုပ်သူများအား ငွေကြေးတောင်းခံမှုများ ရှိနေ

.

တောင်ကြီးမြို့ပေါ်ရှိ ရပ်ကွက်အုပ်ချုပ်ရေးမှူးရုံးများတွင် ဧည့်စာရင်းတိုင်ခြင်း၊ ထောက်ခံစာ ယူခြင်းနှင့် အိမ်ရှင်အိမ်ငှားစာချုပ် ပြုလုပ်ခြင်းများနှင့်ပတ်သက်၍ ငွေကြေးတောင်းခံမှုများ ရှိနေကြောင်း သိရသည်။

.

.

ထောက်ခံစာပြုလုပ်ခြင်းနှင့်ပတ်သက်၍ ရပ်ကွက်ရုံးများတွင် တစ်စောင်လျှင် ၅၀၀၀ ကျပ်ခန့် တောင်းယူမှုများရှိနေပြီး ဧည့်စာရင်း တိုင်ကြားပါက လာရောက်သည့် ဒေသပေါ်မူတည်၍ ငွေကြေးတောင်းခံမှုများ ပြုလုပ်နေကြောင်း သိရသည်။

.

“အရင်က ထောက်ခံစာသွားယူရင် တစ်ထောင်လောက်ပဲ ပေးရတယ်။ အခု အလုပ်လျှောက်ဖို့အတွက် ထောက်ခံစာ သွားတောင်းတာ စာရွက်စာတမ်းဖိုးတွေ ဈေးတက်သွားလို့ဆိုပြီး ၅၀၀၀ ပေးခဲ့ရတယ်” ဟု တောင်ကြီးမြို့နေ ဒေသခံ တစ်ဦးက ပြောသည်။

.

တောင်ကြီးမြို့ပေါ်ရှိ ရပ်ကွက်အချို့တွင် စစ်ကောင်စီလက်အောက်ခံ ရဲတပ်ဖွဲ့နှင့် အုပ်ချုပ်ရေးမှူးများပေါင်း၍ ညအချိန်များတွင် ဧည့်စာစစ်ဆေးမှုများ ပြုလုပ်နေပြီး ဧည့်စာရင်းတိုင်ကြားထားခြင်း မရှိသူများနှင့် သက်တမ်းလွန် နေသူများ တွေ့ရှိပါက တစ်ဦးလျှင် ဒဏ်ကြေးငွေ ၃၅၀၀၀ ကျပ်အထိ တောင်းယူနေကြောင်းသိ ရသည်။

.

“ရပ်ကွက်တချို့မှာ ညဆိုရင် ရဲနဲ့ အုပ်ကြီးတွေပေါင်းပြီး ဧည့်စာရင်းလိုက်စစ်တာတွေရှိတယ်။ ဧည့်စာရင်း မတိုင်ရ သေးတဲ့လူတွေရှိ ရင်မှတ်ပုံတင်ယူသွားပြီး နောက်ရက်မှ ပိုက်ဆံနဲ့ လာရွေးခိုင်းတာတွေရှိတယ်” ဟု အခြား ဒေသခံ တစ်ဦးကလည်း ပြောသည်။

.

အိမ်ရှင်အိမ်ငှားစာချုပ် ပြုလုပ်ခြင်းနှင့် ပတ်သက်၍လည်း ၆ လစာချုပ်ချုပ်ပါက ၃၀၀၀၀ ကျပ်ခန့်ပေးရပြီး တစ်နှစ်စာချုပ် ချုပ်ပါက ၅၀၀၀၀ ကျပ်အထိ ပေးနေရကြောင်း သိရသည်။

.