တောင်ကြီးတွင် 92 စက်သုံးဆီ တစ်လီတာလျှင် ၂၀၀၀ ကျပ်အောက် ကျဆင်းလာသော်လည်း ကုန်ဈေးနှုန်း ကျဆင်းခြင်းမရှိ

.

မြို့တော်တောင်ကြီး အောက်တိန်း 92 စက်သုံးဆီ တစ်လီတာလျှင် ၂၅၀၀ ကျပ် ဝန်းကျင်ရှိခဲ့ရာမှ ယခုရက်ပိုင်းအတွင်း ၂၀၀၀ ကျပ် အောက်သို့ဈေးနှုန်း ကျဆင်းလာသော်လည်း အခြေခံစားသောက်ကုန် အပါအဝင် အထွေထွေကုန်ဈေးနှုန်း များမှာ ကျဆင်းခြင်းမရှိသေးကြောင်း သိရသည်။

.

.

ယင်းကဲ့သို့ စက်သုံးဆီစျေးနှုန်း တစ်လီတာလျှင် ၅၀၀ ကျပ်နီးပါး ဈေးနှုန်းကျဆင်းလာသော်လည်း အခြေခံ စားသောက်ကုန် ဈေးနှုန်းများမှာမူ ကျဆင်းလာခြင်း မရှိသည့်အတွက် လက်လုပ်လက်စား ပြည်သူများ အခက်အခဲ ဖြစ်ပေါ်နေရကြောင်း သိရသည်။

.

“ဓာတ်ဆီဈေးနှုန်း ကျလာတယ်ဆိုပေမဲ့ စားသောက်ကုန်ဈေးတွေက မကျသေးပါဘူး။ ဆန်ဈေး၊ ဆီဈေးတွေ တက်နေတဲ့အပြင် အသီးအရွက်ဈေးနှုန်းတွေပါ တက်နေတုန်းပါ” ဟု တောင်ကြီးမြို့နေ ဒေသခံတစ်ဦးက ပြောသည်။

.

တောင်ကြီးမြို့ပေါ် ဈေးကွက်တွင် ရွှေဘိုပေါ်ဆန်း ရှယ်တစ်အိတ်လျှင် ၉၂၀၀၀ ကျပ်ခန့်၊ ဖျာပုံပေါ်ဆန်းရှယ် တစ်အိတ်လျှင် ၆၈၀၀၀ ကျပ်ခန့်၊ ဆန်ကြမ်းတစ်အိတ်လျှင် ၄၇၀၀၀ ကျပ်ခန့်၊ စားအုန်းဆီ တစ်ပိဿာလျှင် ၉၀၀၀ ကျပ်ခန့်၊ ကြက်ဥ ၁၀ လုံး ၂၅၀၀ ကျပ်ခန့် ပေါက်ဈေးရှိနေကြောင်း သိရသည်။

.

စက်သုံးဆီဈေးနှုန်း ကျဆင်းနေသော်လည်း အခြေခံစားသောက်ကုန် လက်လီ၊ လက်ကား ဖြန့်ဖြူးရောင်းချသည့် ကုန်သည်များအနေဖြင့် ဈေးအမြင့်များဖြင့် ဝယ်ယူထားရသဖြင့် ဈေးနှုန်း ချက်ချင်းချပေးနိုင်ရန် ခက်ခဲနေဆဲ ဖြစ်ကြောင်း သိရသည်။

.

“ဓါတ်ဆီဈေးကျတယ်ဆိုပေမဲ့ ကျွန်တော်တို့ဝယ်တဲ့အချိန်တုန်းက ပစ္စည်းဈေးတွေက အတက်ဈေးနဲ့ ပေးဝယ်ထားရတာပါ။ အဲဒါကြောင့် ကုန်ဈေးနှုန်းက ချက်ချင်းကြီး လိုက်ချပေးလို့ အဆင်မပြေဘူးပေါ့။ ဖောက်သည်တွေ အဆင်ပြေအောင် တော့ တတ်နိုင်တဲ့ဈေးနှုန်းနဲ့ ရောင်းချပေးနေပါတယ်” ဟု တောင်ကြီးမြို့ပေါ်တွင် စားသောက်ကုန် လက်ကား ဖြန့်ဖြူး ရောင်းချသူတစ်ဦးက ပြောသည်။

.

တောင်ကြီးမြို့ပေါ်တွင် ယနေ့ အောက်တိုဘာလ ၅ ရက်၌ ဒီဇယ်ရိုးရိုး တစ်လီတာလျှင် ၂၅၇၀ ကျပ်၊ ပရီမီယံဒီဇယ် တစ်လီတာလျှင် ၂၆၄၅ ကျပ်၊ အောက်တိန်း 92 တစ်လီတာလျှင် ၁၉၆၅ ကျပ်၊ အောက်တိန်း 95 တစ်လီတာလျှင် ၂၀၃၀ ကျပ်၊ အောက်တိန်း 97 တစ်လီတာလျှင် ၂၁၃၀ ကျပ် ပေါက်ဈေးရှိနေကြောင်း သိရသည်။

.