အကြောင်းအမျိုးမျိုးဖြင့် နိုင်ငံပြင်ပ ရောက်ရှိနေသည့် နိုင်ငံသားများကို ကူညီစောင့်ရှောက်ပေးလျက်ရှိကြောင်း NUG ယာယီသမ္မတ ပြောကြား

.

အကြောင်းအမျိုးမျိုးဖြင့် နိုင်ငံပြင်ပသို့ ရောက်ရှိနေသည့် နိုင်ငံသားများကို ကူညီစောင့်ရှောက်ပေးလျက်ရှိကြောင်း အမျိုးသားညီညွတ်ရေးအစိုးရ ယာယီသမ္မတ ဒူဝါလရှီးလက ပြောဆိုခဲ့သည်ဟု သိရသည်။

.

.

အမျိုးသားညီညွတ်ရေးအစိုးရ၏ ၆၆ ကြိမ်မြောက် အစိုးရအဖွဲ့အစည်း အဝေးကို ယနေ့ စက်တင်ဘာလ ၆ ရက်၊ နံနက်ပိုင်းက ပြုလုပ်ရာ အဖွင့်မိန့်ခွန်းတွင် ယာယီသမ္မတက ယင်းကဲ့သို့ ပြောဆိုခဲ့ခြင်းဖြစ်သည်။

.

“အကြမ်းဖက်စစ်ကောင်စီအနေနဲ့ အပစ်မဲ့ပြည်သူတွေကို နည်းလမ်းမျိုးစုံနဲ့ နှိပ်စက်ပြီး တိုင်းပြည်မှ ထွက်ပြေး သွားအောင် နှင်ထုတ်နေတာ တွေ့ရပါတယ်။ ကျနော်တို့ အမျိုးသား ညီညွတ်ရေးအစိုးရက နိုင်ငံပြင်ပကို အကြောင်း အမျိုးမျိုးနဲ့ ထွက်ခွာသွားတဲ့ တို့နိုင်ငံသားများကို ကူညီစောက်ရှောက်နိုင်ဖို့ လုပ်ဆောင်ပေး နေတဲ့ အစိုးရဖြစ်ပါတယ်။ ကာကွယ်ပေးဖို့လည်း တာဝန်ရှိပါတယ်” ဟု ယာယီသမ္မတက ပြောသည်။

.

ထို့အတူ ပြည်သူ့ခုခံတော်လှန်စစ် ကြေညာသည့် တစ်နှစ်တာကာလအတွင်း NUG အနေဖြင့် အောင်မြင်မှုများ ရှိခဲ့ သလို စိန်ခေါ်မှုများ၊ ထိခိုက်နစ်နာမှုများလည်း ရှိခဲ့ကြောင်း၊ အဆိုပါ ထိခိုက်နစ်နာမှုများကို သင်ခန်းစာယူပြီး စိန်ခေါ်မှု များကို ကျော်လွှားကာ ပြည်သူလူထု လိုလားမျှော်မှန်းသည့် ပန်းတိုင်ကို အမြန်ဆုံးရရှိအောင် ဆက်လက်အားတင်း အကောင်အထည်ဖော်သွားမည်ဖြစ်ကြောင်း ၎င်းက ဆက်လက်ပြောဆိုခဲ့သည်။

.

ထို့နောက် ပြည်ထောင်စုဝန်ကြီးချုပ် မန်းဝင်းခိုင်သန်းက အမှာစကား ပြောကြားခဲ့ပြီး ပြည်ထဲရေးနှင့် လူဝင်မှု ကြီးကြပ်ရေး ဝန်ကြီးဌာန၊ ဒုတိယဝန်ကြီး ခူးထဲဘူးက ပြည်ပရောက် မြန်မာနိုင်ငံသားများ၏ သားသမီးများကို မွေးစားရင်းလက်မှတ်ထုတ်ပေးမှုလုပ်ငန်းနှင့် ပတ်သက်၍ ရှင်းလင်းတင်ပြခြင်း၊ ပြည်ထောင်စုဝန်ကြီးချုပ်က ပြန်လည်ရှင်းလင်းဆွေးနွေးခြင်းများ ဆောင်ရွက်ကာ ယာယီသမ္မတက နိဂုံးချုပ်အမှာစကား ပြောကြားခဲ့ကြောင်း သိရသည်။

.

အဆိုပါ အမျိုးသားညီညွတ်ရေးအစိုးရ၏ ၆၆ ကြိမ်မြောက် အစိုးရအဖွဲ့အစည်းအဝေးသို့ ယာယီသမ္မတ ဒူဝါလရှီးလ၊ ပြည်ထောင်စုဝန်ကြီးချုပ် မန်းဝင်ခိုင်သန်းနှင့် ပြည်ထောင်စုဝန်ကြီးများ၊ ဒုတိယဝန်ကြီးများ တက်ရောက်ခဲ့ကြောင်း သိရသည်။

.

စက်တင်ဘာလ ၇ ရက်တွင် ပြည်သူ့ခုခံတော်လှန်စစ် ကြေညာခြင်း တစ်နှစ်ပြည့်အထိမ်းအမှတ်အဖြစ် ယာယီသမ္မတ ဒူဝါလရှီးလက နိုင်ငံတော်အခြေပြုမိန့်ခွန်း ပြောကြားသွားမည်ဖြစ်ကြောင်း သိရသည်။

.