ပြည်သူ့ရင်ခွင် ခိုလှုံလာသည့် တပ်မတော်သားများနှင့် ရဲတပ်ဖွဲ့ဝင်များကို ပြည်သူ့သား​ကောင်းများအဖြစ် မှတ်ယူကြောင်း NUG ကာကွယ်ရေးဝန်ကြီး ဂုဏ်ပြု သဝဏ်လွှာ ပို့ - Kanbawza Tai News

Breaking

ကမ္ဘောဇတိုင်း သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (၀၁၀၇၉)ဖြင့် ဆောင်ရွက်နေသည့် သတင်းမီဒီယာ ဖြစ်သည်။ contact; kanbawzatai.editor@gmail.com

ပြည်သူ့ရင်ခွင် ခိုလှုံလာသည့် တပ်မတော်သားများနှင့် ရဲတပ်ဖွဲ့ဝင်များကို ပြည်သူ့သား​ကောင်းများအဖြစ် မှတ်ယူကြောင်း NUG ကာကွယ်ရေးဝန်ကြီး ဂုဏ်ပြု သဝဏ်လွှာ ပို့

ပြည်သူ့ရင်ခွင်သို့ ခိုလှုံလာသည့် တပ်မတော်သားများနှင့် ရဲတပ်ဖွဲ့ဝင်များကို ပြည်သူ့သား​ကောင်းများအဖြစ် မှတ်ယူကြောင်း အမျိုးသားညီညွတ်ရေးအစိုးရ (NUG)၊ ကာကွယ်ရေးဝန်ကြီးဌာန ပြည်ထောင်စုဝန်ကြီး ဦးရည်မွန်က ယမန်နေ့ (စက်တင်ဘာ ၁၁ ရက်)တွင် ဂုဏ်ပြုသဝဏ်လွှာ ပေးပို့ခဲ့သည်။

.



“ ပြည်သူ့ရင်ခွင် ခိုလှုံလာတဲ့ တပ်မ​တော်သားများ၊ ရဲတပ်ဖွဲ့ဝင်များ အားလုံးကို  အမျိုးသားညီညွတ်​ရေးအစိုးရက ပြည်သူ့သား​ကောင်းများအဖြစ် မှတ်ယူတယ်။ ပြည်သူ့ သားသမီးများပီပီ ပြည်သူဘက်က ရပ်တည်ဖို့၊ ပြည်သူနဲ့ ပူး​ပေါင်းဖို့ ဆုံးဖြတ်ခဲ့ကြတဲ့ ရဲ​ဘော်တို့ရဲ့ အသိဉာဏ်ပညာအတွက် ဂုဏ်ယူ​လေးစား​ကြောင်း ​ ပြောလိုတယ်။ အခုဆို ရဲ​ဘော်တို့ဟာ ပြည်သူ့ကွယ်​ရေးတပ်မ​တော်PDFရဲ​ဘော်များအဖြစ်ခံယူပြီးဖြစ်ရုံမက လက်​တွေ့​တော်လှန်​ရေးမှာ ပါဝင်နေကြပြီလည်း ဖြစ်တယ်။ ဒီသတင်းကို ပြည်သူ​တွေကြားရင် ဂုဏ်ယူမဆုံး ရှိလိမ့်မယ်။” ဟု ဂုဏ်ပြုသဝဏ်လွှာတွင် ဖော်ပြထားသည်။

.

ဗိုလ်ချုပ်​အောင်ဆန်း တည်​ထောင်ခဲ့သော တပ်မ​တော်သည် ကိုယ်ကျိုးအာဏာ ငမ်းဖမ်း​နေသည့် စစ်​ခေါင်း​ဆောင် တစ်စု​ကြောင့် ထိခိုက်ပျက်စီးခဲ့ရပြီ ဖြစ်ရာ စိတ်သစ်၊ လူသစ်၊ အ​တွေးအ​ခေါ်အသစ်နှင့့် ပြည်သူ့ကာကွယ်​ရေး တပ်မ​တော်သစ်ကို ဗိုလ်ချုပ်​အောင်ဆန်း၏ လမ်းညွှန်ချက်၊ ရှေ့ဆောင်လမ်းပြမှုနှင့် အညီ အသစ်တည်​ထောင်​နေကြောင်းနှင့် ယင်းတပ်မ​တော်သည် ​ပေါ်​ပေါက်လာမည့် ဖက်ဒရယ်ပြည်​ထောင်စုတပ်​တော်၏ ရှေ့​ပြေးအမြုတေလည်း ဖြစ်သည်ဟုလည်း ဖော်ပြထားသည်။

.

နိုင်ငံ၏ တည်ငြိမ်မှု၊ ပြည်သူ​များ၏ လုံခြုံမှုအတွက် တာဝန်ရှိသဖြင့် ကာကွယ်​စောင့်​ရှောက်ကြရမည် ဖြစ်ပြီး လက်နက်အားကိုး၍ ပြည်သူကို ရန်ပြု​နေသော စစ်​ကောင်စီကို လက်နက်ကိုင် တွန်းလှန် ဖယ်ရှားပစ်ရန်မှာ လတ်တ​လော တာဝန်ဖြစ်ကြောင်း အသိပေးထားသည်ကို တွေ့ရသည်။

.

စစ်​ကောင်စီတပ်သည် စိတ်ဓါတ်၊ စည်းကမ်း၊ ကျင့်ဝတ် ကင်းမဲ့ရုံမက စစ်တိုက်နိုင်စွမ်းလည်း မရှိ၊ အပြစ်မဲ့ ပြည်သူကို ရန်ရှာ၊ မီးရှို့၊ သတ်ဖြတ်ဖို့သာ တတ်နိုင်​တော့သည့် လက်မရွံ့လူသတ်ဓားပြဂိုဏ်း အဆင့်ကို ​လျောကျသွားခဲ့ပြီ ဖြစ်၍ စစ်အုပ်စု၏ ​နေဝင်ချိန် မ​ဝေး​တော့ကြောင်းနှင့် “ငါတို့အားလုံး စွန့်လွှတ်ကြမယ်၊ အနစ်နာခံကြမယ်၊ ရဲ​ဘော်ရဲဘက် အချင်းချင်း ညီအကိုရင်းလို ညီညွတ် ကြမယ်။ စစ်အုပ်စုကို အနိုင်ယူပြီး ပြည်သူနဲ့အတူ ​အောင်ပွဲခံကြမယ်။” ဟူ၍လည်း သဝဏ်လွှာတွင် ဖော်ပြထားသည်။



Journal Download

Photo of three cats