ဒေါ်အောင်ဆန်းစုကြည် နေထိုင်ရာ ခြံအမှတ် ၅၄ နှင့် ၅၆ ကို ယဉ်ကျေးမှုအမွေအနှစ်အဖြစ် NUG သတ်မှတ်

.

နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် နေထိုင်ရာ ရန်ကုန်မြို့၊ တက္ကသိုလ်ရိပ်သာလမ်းရှိ ခြံအမှတ် ၅၄ နှင့် ၅၆ ကို အမျိုးသားညီညွတ်ရေးအစိုးရ (NUG) က အမျိုးသားအဆင့် ယဉ်ကျေးမှုအမွေအနှစ်အဖြစ် သတ်မှတ်ပြီး အခြားနည်းဖြင့် အသုံးချပါက အရေးယူခံရမည်ဖြစ်ကြောင်း ယနေ့ စက်တင်ဘာလ ၂ ရက်တွင် ထုတ်ပြန်ကြေညာခဲ့သည်။

.

.

ရန်ကုန်တိုင်းဒေသကြီး ဗဟန်းမြို့နယ် အမှတ်(၅၄-၅၆)၊ တက္ကသိုလ်ရိပ်သာလမ်းရှိ ခြံဝန်းဧရိယာ ၁ ဒသမ ၉၂၃ ဧကနှင့် ယင်းမြေဧရိယာပေါ်ရှိ ရွေ့ပြောင်း၍ မရသည့် အဆောက်အအုံ အားလုံးအား ကြားကာလ၏ အမျိုးသားအဆင့် ယဉ်ကျေးမှု အမွေအနှစ်အဖြစ် သတ်မှတ်လိုက်ခြင်းဖြစ်သည်ဟု NUG က ထုတ်ပြန်ထားသည်။

.

အမျိုးသားအဆင့် ယဉ်ကျေးမှုအမွေအနှစ်အဖြစ် သတ်မှတ်ထားသော ယင်းမြေနှင့် အဆောက်အအုံနေရာအား မည်သူမဆို ပိုင်ဆိုင်ခြင်း၊ ပိုင်ဆိုင်ရန်ကြိုးစားခြင်း၊ ရောင်းချခြင်း၊ ရောင်းချရန်ကြိုးစားခြင်း၊ ဖျက်ဆီးခြင်း၊ ဖျက်ဆီးရန် ကြိုးစားခြင်း၊ ပုံစံပြောင်းခြင်း၊ ပြင်ဆင်ခြင်း၊ အခြားနည်း အသုံးချခြင်းများအား တင်းကြပ်စွာတားမြစ်ကြောင်း ထုတ်ပြန် ချက်တွင် ဖော်ပြထားသည်။

.

ထို့အပြင် တားမြစ်ချက်များအား ဖောက်ဖျက်ကျူးလွန်ပါက ယဉ်ကျေးမှု အမွေအနှစ်များ ကာကွယ်ထိန်းသိမ်းရေးဥပဒေ (၂၀၁၉)၊ မရွှေ့မပြောင်းနိုင်သောပစ္စည်းများ လွှဲပြောင်းခြင်းကို ကန့်သတ်သည့် ဥပဒေ (၁၉၈၇) တို့အပြင် အကြမ်းဖက်မှုတိုက်ဖျက်ရေးဥပဒေတို့နှင့်အညီ အရေးယူ ဆောင်ရွက်သွားမည်ဖြစ်ကြောင်း သိရသည်။

.

အဆိုပါ ခြံအမှတ် ၅၄ သည် ဒေါ်အောင်ဆန်းစုကြည်နှင့် အကိုဖြစ်သူ ဦးအောင်ဆန်းဦးတို့အကြား ကာလကြာ အမွေမှု ဖြစ်ပွားခဲ့သည့်ခြံဖြစ်ပြီး ဒေါ်အောင်ဆန်းစုကြည်အား ဖမ်းဆီးထားသည့် စစ်ကောင်စီက ဦးအောင်ဆန်းဦး၏ အယူခံကို အနိုင်ပေးခဲ့ခြင်းဖြစ်သည်။

.