.
မိုဘိုင်းလ်ငွေကြေးဝန်ဆောင်မှုလုပ်ငန်းတစ်ခုဖြစ်သည့်
KBZ Pay ၏ ယခုရက်ပိုင်းအတွင်း
ထွက်ပေါ်လာသော ကန့်သတ်ချက် အသစ်များကြောင့် သုံးစွဲသူများအကြား အခက်အခဲများ ဖြစ်ပေါ်လာနေပြီး
စိုးရိမ်မှုများလည်း ရှိလာနေကြောင်း သိရသည်။
.
ပြီးခဲ့သည့် ရက်ပိုင်းမှစ၍
စစ်ကောင်စီ၏ မြန်မာ့စီးပွားရေးဘဏ်က Level
(2) အဆင့် မရှိသော KBZ Pay အကောင့် များ၊ ဖုန်းနံပါတ်၊
မှတ်ပုံတင်နှင့် မကိုက်ညီသည့် KBZ Pay အကောင့်များကို ပိတ်သိမ်းသွားမည်ဖြစ်ကြောင်း
ထုတ်ပြန် ကြေညာခဲ့ပြီးနောက် ယင်းကဲ့သို့ အခက်အခဲများ ဖြစ်ပေါ်လာနေခြင်းဖြစ်ကြောင်း
သိရသည်။
.
KBZ Pay ငွေလွဲငွေထုတ်ဝန်ဆောင်မှုသည်
တောင်ကြီးမြို့ အပါအဝင် ပြည်တွင်းရှိ သုံးစွဲသူများအကြား၌ အသုံးပြုမှု အများဆုံး မိုဘိုင်းလ်ငွေကြေးဝန်ဆောင်မှုအမျိုးအစားများအနက်
တစ်ခုအပါအဝင်ဖြစ်ပြီး ယခုကဲ့သို့ ကန့်သတ်ချက်များ ကြောင့် သုံးစွဲသူများအကြား စိုးရိမ်ပူပန်မှုများ
ဖြစ်ပေါ်နေရကြောင်း သိရသည်။
.
“အခုကြားနေရတာက ဘယ်
Level မှာပဲဖြစ်ဖြစ်
အသုံးပြုသူတွေရဲ့ အချက်အလက်တွေကို ကန့်သတ်မှုတွေ လုပ်လာ တာပေါ့။ သုံးရတာလည်း
စိတ်ချရတဲ့အနေအထားမျိုးမှာ ရှိမနေတော့ဘူး။ တချို့တွေဆို ရှိတဲ့ငွေတွေ အကုန်ပြန်ထုတ်
ဖို့တောင် လုပ်လာတာတွေရှိပါတယ်။ တချို့ဆိုင်တွေကလည်း KBZ Pay လက်မခံတော့ဘူးလို့ ကြားရတယ်”
ဟု တောင်ကြီးမြို့ပေါ်နေ KBZ Pay သုံးစွဲသူတစ်ဦးကပြောသည်။
.
KBZ Pay ဝန်ဆောင်မှုနှင့်ပတ်သက်၍
သုံးစွဲသူများကြား ဝေဖန်မှုအမျိုးမျိုး ထွက်ပေါ်နေပြီး ယခုရက်ပိုင်းအတွင်း KBZ
Pay Agent ဆိုင်အချို့တွင်လည်း ငွေသားထုတ်ယူမှုအား
အကန့်အသန့်ဖြင့် ပြုလုပ်လာနေကြကြောင်း သိရသည်။
.
“ဒီနေ့ညနေ ၃ နာရီလောက်က
ပစ္စည်းဖိုးရှင်းဖို့ ပိုက်ဆံလိုတာနဲ့ ထုတ်နေကျဆိုင်မှာ ၃ သိန်း ထုတ်ဖို့သွားတာ ၁ သိန်းပဲ
ထုတ်လို့ရတယ်လို့ ပြောတယ်။ ထုတ်တဲ့လူ များတဲ့အတွက် ငွေသားပြတ်နေတယ်လို့ ပြောတာပေါ့။
သတင်းတွေ ကလည်း အမျိုးမျိုးထွက်နေတော့ ဘယ်လိုယုံကြည်ရမှန်းတောင် မသိတော့ဘူး” ဟု
တောင်ကြီးမြို့နေ ဒေသခံတစ်ဦး က ပြောသည်။
.
ထို့အပြင် မှတ်ပုံတင်၊
ဖုန်းနံပါတ်နှင့် KBZ Pay အကောင့် တူညီသည့်အပြင် Level 2 အဆင့်ရှိ အကောင့်အချို့လည်း
ပိတ်သိမ်းခံရမှုများ ရှိနေကြောင်း ပြောဆိုမှုများ ရှိနေသည်။
.
အလားတူ အခြား မိုဘိုင်းလ်ငွေကြေးဝန်ဆောင်မှုလုပ်ငန်းတစ်ခုဖြစ်သော
Wave Money ငွေကြေးဝန်ဆောင်မှုလုပ်ငန်း
များတွင်လည်း စစ်ကောင်စီ၏ ကန့်သတ်ချက်အသစ်များကြောင့် အခက်အခဲများ ဖြစ်ပေါ်လာနေကြောင်း
သိရသည်။
.
