တောင်ကြီးမြို့နယ်၌ ယခု စက်တင်ဘာလ ၁ ရက်မှ ၂၄ ရက်အတွင်း COVID-19 ပိုး ရှိသူ ၃၄ ဦး တွေ့ရှိခဲ့ကြောင်း စစ်ကောင်စီ ကျန်းမာရေးဝန်ကြီးဌာန၏ COVID-19 ရောဂါစောင့်ကြပ်ကြည့်ရှုမှု အခြေအနေပါ အချက်အလက်များ အရ သိရသည်။
.
ထို့အတူ ရှမ်းပြည်နယ် တစ်ခုလုံး၌ စက်တင်ဘာလအတွင်း
COVID-19 ပိုး ရှိသူ ၁၈၇ ဦးကို တွေ့ရှိခဲ့သည်ဟု စစ်ကောင်စီ ကျန်းမာရေးဝန်ကြီးဌာန၏ COVID-19
ရောဂါစောင့်ကြပ်ကြည့်ရှုမှု အခြေအနေတွင် ဖော်ပြထားသည်။
.
ယင်း အချက်အလက်များမှာ စစ်ကောင်စီ ကျန်းမာရေးဝန်ကြီးဌာန၏
ထုတ်ပြန်ချက်သာ ဖြစ်ပြီး မြေပြင်တွင် ယခုထက် ပိုမို များပြားနိုင်သည့် အပြင် သေဆုံးသူများပါ
ရှိနေသည့်အတွက် ပြည်သူများ သတိပြုရန် လိုအပ်သည်ဟု အမည် မဖော်လိုသူ သတင်းရင်းမြစ် တစ်ဦးက
ပြောသည်။
.
“ အဲဒါက ထုတ်ပြန်ချက်ပေါ့။ မြေပြင်မှာက ပို များတာပေါ့။
အဲဒါက စစ်လို့ တွေ့တာနော်၊ မစစ်လို့ မတွေ့တဲ့သူက အများကြီးရယ်။ သေတဲ့သူတွေလည်း ရှိတယ်။
အဲဒါကြောင့် ပြည်သူတွေ သတိထားစေချင်တယ်။ ကိုယ်ဖြစ်ရင် ကိုယ်ပဲ ခံရမှာ။ စကစ လက်ထက်မှာ
ဘာမှ မျှော်လင့်မနေနဲ့။ ကာကွယ်ရေး နည်းလမ်းတွေကို လိုက်နာ၊ (COVID-19 ) ကာကွယ်ဆေး ထိုးခွင့်ရရင်
ထိုးစေချင်တယ်။” ဟု အဆိုပါ သတင်းရင်းမြစ်က ဆိုသည်။
.
စစ်ကောင်စီ ကျန်းမာရေးဝန်ကြီးဌာန၏ ရောဂါစောင့်ကြပ်ကြည့်ရှုမှု
အခြေအနေတွင် သေဆုံးသူ အရေအတွက်ကို ဖော်ပြထားခြင်း မရှိဘဲ မြေပြင်တွင် ရှမ်းပြည်နယ်
တစ်ခုလုံး၌ ၅ ဦးထက်မနည်း COVID-19 ဖြင့် သေဆုံးသူ ရှိသည်ဟုလည်း ၎င်းက ဆက်လက် ပြောဆိုသည်။
.
မြန်မာနိုင်ငံတွင် COVID-19 ပိုးရှိသူ စုစုပေါင်း
၆၂၁၁၂၄ ဦး တွေ့ရှိခဲ့ပြီး ယင်းအနက် ၅၉၆၆၅၈ ဦးမှာ ဆေးရုံမှ ပြန်လည် ဆင်းခွင့် ရရှိခဲ့ကာ
၁၉၄၄၅ ဦးမှာ သေဆုံးခဲ့ရကြောင်း သိရသည်။
.
