စစ်ကောင်စီအာဏာသိမ်းပြီးနောက် တောင်ကြီးတွင် သတင်းစာ၊ ဂျာနယ်ဈေးကွက် ပျက်စီးသွား

.

စစ်ကောင်စီ အာဏာသိမ်းပြီးသည့် နောက်ပိုင်းမှစ၍ တောင်ကြီးမြို့ပေါ်တွင် နေ့စဉ်ထုတ် သတင်းစာနှင့် အပတ်စဉ် ထုတ် ဂျာနယ်များ ဖတ်ရှုသူမရှိတော့သည့်အတွက် သတင်းစာ၊ ဂျာနယ်ဈေးကွက် လုံးဝပျက်စီးသွားကြောင်း သိရသည်။

.

.

ပြည်သူ့အစိုးရလက်ထက်တွင် ပုဂ္ဂလိကသတင်းစာနှင့် ဂျာနယ်များ လွတ်လပ်စွာ ထုတ်ဝေခွင့်ရသည့်အတွက် ဝယ်ယူဖတ်ရှုသူ များပြားခဲ့ပြီး ယခုအခါ စစ်ကောင်စီဝါဒဖြန့် သတင်းစာများသာ ထွက်ရှိနေသည့်အတွက် ဖတ်ရှုသူ မရှိတော့ခြင်းဖြစ်ကြောင်း သိရသည်။

.

“အရင်ကတော့ နေ့စဥ်ထုတ်သတင်းစာတွေ၊ တောင်ကြီးအခြေစိုက် ထုတ်နေတဲ့ ဂျာနယ်တွေ ဖတ်ဖြစ်ပါတယ်။ အခုနောက်ပိုင်းကျတော့ သူတို့ဝါဒဖြန့်သ တင်းစာတွေပဲထွက်တော့ မဖတ်တော့ဘူး” ဟု တောင်ကြီးမြို့ပေါ်တွင် နေထိုင်သူတစ်ဦးက ပြောသည်။

.

ပြည်သူ့အစိုးရလက်ထက်တွင် လွတ်လပ်သည့် သတင်းစာနှင့် ဂျာနယ်အများအပြား ထွက်ရှိခဲ့ပြီး လက်ပွေ့ ရောင်းချသူများ  အဆင်ပြေခဲ့သော်လည်း စစ်ကောင်စီ အာဏာသိမ်းပြီး နောက်ပိုင်းမှစ၍ ဝါဒဖြန့် သတင်းစာများသာ ထွက်ရှိတော့သည့်အတွက် ဖတ်ရှုသူမရှိသဖြင့် သတင်းစာ/ဂျာနယ် လက်ပွေ့ရောင်းချသူများလည်း ဘဝရပ်တည်ရန် ခက်ခဲလာနေကြောင်း သိရသည်။

.

“အာဏာသိမ်းပြီးနောက်ပိုင်း လူအများစုဖတ်တဲ့သတင်းစာနဲ့ ဂျာနယ်တွေ မထွက်တော့ဘူးလေ။ အဲဒီတော့ ဂျာနယ် ရောင်းတဲ့အလုပ်နဲ့က မိသားစုစားဝတ်နေရေး ရပ်တည်လို့မရတော့ဘူးပေါ့။ အခုတော့ ကြုံရာကျပန်း လိုက်လုပ်နေ ရတယ်” ဟု ယခင်က တောင်ကြီးမြို့ပေါ်တွင် သတင်းစာနှင့်ဂျာနယ် လက်ပွေ့ရောင်းချခဲ့ဖူးသူတစ်ဦးက ပြောသည်။

.

စစ်ကောင်စီ အာဏာသိမ်းပြီးနောက်ပိုင်း ပြည်သူအများစုဖတ်ရှုသည့် နေ့စဉ်ထုတ် သတင်းစာနှင့် ဂျာနယ်များအား ထုတ်ဝေခွင့်ပိတ်သိမ်းခြင်း၊ သတင်းသမားများအား ဖမ်းဆီးထောင်ချခြင်းများ ရှိခဲ့ပြီး ဝါဒဖြန့်သတင်းစာများသာ ဆက်လက်ထုတ်ဝေနေသည့်အတွက် သတင်းစာနှင့် ဂျာနယ်ဈေးကွက် လုံးဝပျက်စီးသွားခြင်းဖြစ်ကြောင်း စာဖတ်သူများက ဝေဖန်ပြောဆိုကြသည်။

.