တောင်ကြီးတွင် ရိုးရာမီးပုံးပျံနှင့် ရောင်စုံမီးပုံးလုပ်ငန်းများ အရောင်းအဝယ်ပါးနေ

သီတင်းကျွတ်အချိန်အခါ နီးကပ်လာသော်လည်း တောင်ကြီးမြို့ပေါ်ရှိ တောင်ကြီးမြို့ရိုးရာ အပျော်လွှတ် မီးပုံးပျံလုပ်ငန်းနှင့် မြန်မာ့ရိုးရာ ရောင်စုံမီးပုံးလုပ်ငန်းများ အရောင်းအဝယ် ပါးနေကြောင်းသိရသည်။

.

.

စစ်ကောင်စီ အာဏာသိမ်းပြီးနောက်ပိုင်း တောင်ကြီးမြို့၏ ရိုးရာပွဲတော်တစ်ခုဖြစ်သည့် မီးပုံးပျံပြိုင်ပွဲ ပြုလုပ်နိုင်ခြင်း မရှိတော့ဘဲ အပျော်လွှတ်မီးပုံးပျံလုပ်ငန်းများလည်း အရောင်းအဝယ်မရှိသလောက် ကျဆင်းသွား ကြောင်းသိရသည်။

.

“ပုံမှန်အတိုင်းဆိုရင် ဒီလိုအချိန်ဆို အပျော်လွှတ် မီးပုံးပျံတွေ ရောင်းနေရပြီ။ မြို့ပေါ်ရောင်းအားနဲ့ နယ်ဝယ်လက် တွေရှိတော့ အဆင်ပြေခဲ့တာပေါ့။ အခုကျတော့ နယ်ဝယ်လက်လည်း မရှိ မြို့ပေါ်လည်း မရောင်းရတော့ ကြာရင် ဒီလုပ်ငန်း ပျောက်သွားမှာတောင်စိုးရိမ်ရတယ်” ဟု အပျော်လွှတ်မီးပုံးပျံလုပ်ငန်း လုပ်ကိုင်သူတစ်ဦးက ပြောသည်။

.

တောင်ကြီးမြို့ပေါ်တွင် ရိုးရာမီးပုံးပျံများ အရောင်းကျဆင်းနေသည့်အပြင် မြန်မာ့ရိုးရာ ရောင်စုံမီးပုံးလုပ်ငန်းများလည်း ဝယ်ယူသူမရှိ သလောက်ဖြစ်နေသည့်အတွက် မီးပုံးလုပ်ငန်း လုပ်ကိုင်သူအများစုလည်း လုပ်ငန်းများ ရပ်နားထားရကြောင်း သိရသည်။

.

“အခုနောက်ပိုင်း မီးပုံးတွေက ဝယ်တဲ့လူ တော်တော်ပါးသွားတယ်။ တရုတ်ကသွင်းတဲ့ ရောင်စုံမီးတွဲတွေ ဝယ်လူများတော့ စက္ကူနဲ့လုပ်ထားတဲ့ ရိုးရာမီးပုံးတွေ ဝယ်သူမရှိသလောက် ဖြစ်သွားတာပေါ့” ဟု ရောင်စုံမီးပုံး လုပ်ကိုင်သူ တစ်ဦးကပြောသည်။

.

COVID-19 ရောဂါ နှင့် နိုင်ငံရေးအခြေအနေများကြောင့် တောင်ကြီးမြို့ ရိုးရာ မီးပုံးပျံပြိုင်ပွဲ ပြုလုပ်နိုင်ခြင်း မရှိတော့သည့်အပြင် မြို့ပေါ်ရှိအပျော်လွှတ်မီးပုံးပျံလုပ်ငန်းများလည်း ကျဆင်းလာနေကြောင်းသိရသည်။