ဒီပဲယင်း လက်ယက်ကုန်းကျေးရွာ ဖြစ်စဉ်နှင့် ပတ်သက်၍ တောင်ကိုရီးယားပြည်သူများက စစ်ကောင်စီကို ဓါတ်ပုံ ကမ်းပိန်းပြုလုပ် ကန့်ကွက်

.

စစ်ကိုင်းတိုင်း၊ ဒီပဲယင်းမြို့နယ်၊ လက်ယက်ကုန်းကျေးရွာတွင် စာသင်နေသည့် ကလေးငယ်များကို လေကြောင်းအပြင် မြေပြင်မှ တိုက်ခိုက်သတ်ဖြတ်မှုနှင့် ပတ်သက်၍ တောင်ကိုရီးယားပြည်သူများက စစ်ကောင်စီကို ဓါတ်ပုံကမ်းပိန်း ပြုလုပ်၍ ကန့်ကွက်လျက်ရှိကြောင်း သိရသည်။

.

.

“ငါသည် ကလေးတွေကို သတ်ဖြတ်သည့် မြန်မာစစ်တပ်ကို လုံးဝ ခွင့်မလွှတ်” ဟု ကိုရီးယားဘာသာဖြင့် ရေးသား ထားသည့် စာသားကို ကိုင်ဆောင်ထားပြီး အွန်လိုင်းဓာတ်ပုံ ကမ်ပိန်းကို ပြုလုပ်နေကြခြင်းဖြစ်သည်။

.

ကမ်ပိန်းဦးဆောင်သူ ကိုရီးယားပြည်သူတစ်ဦးက ကလေးငယ်များ ပညာသင်ကြားနေသည့် စာသင်ကျောင်းကို ပစ်မှတ်ထား တိုက်ခိုက်ခဲ့သည့် စစ်ကောင်စီတပ်၏ လုပ်ရပ်မှာ လူမဆန်၊ ကြမ်းကြုတ်သည့် စစ်ရာဇဝတ်မှု ကျူးလွန်ခြင်းဖြစ်ပြီး ယင်းကဲ့သို့ အပြစ်မဲ့ကလေးများကို အစုလိုက် အပြုံလိုက် သတ်ဖြတ်ခဲ့သည့် စစ်ကောင်စီတပ်ကို ကန့်ကွက်ရှုတ်ချသည့်အနေဖြင့် ဓာတ်ပုံကမ်ပိန်း ပြုလုပ်ရခြင်းဖြစ်ကြောင်း ပြောဆိုထားသည်။

.

ပြီးခဲ့တဲ့ စက်တင်ဘာ ၂၅ ရက်ကလည်း ကိုရီးယားရောက် မြန်မာများနှင့် ကိုရီးယားနိုင်ငံသားများ စုပေါင်းပြီး စစ်ကောင်စီတပ်ကို ကန့်ကွက်ရှုတ်ချ ချီတက်ဆန္ဒပြပွဲများကို ဆိုးလ်မြို့ရှိ စစ်သံရုံးနှင့် မြန်မာသံရုံးရှေ့တွင် ပြုလုပ်ခဲ့ကြသည်။

.

ပဲယင်းမြို့နယ်၊ လက်ယက်ကုန်းကျေးရွာရှိ စာသင်ကျောင်းတစ်ကျောင်းကို အာဏာသိမ်းစစ်တပ်က ပစ်ခတ်တိုက်ခိုက် ခဲ့မှုကြောင့် ကလေး ၁၁ ဦး အပါအဝင် လူ ၁၃ ဦးထက်မနည်း သေဆုံးခဲ့ခြင်းဖြစ်ပြီး အဆိုပါဖြစ်စဉ်နှင့် ပတ်သက်၍ ကုလသမဂ္ဂ အတွင်းရေးမှူးချုပ် အန်တိုနီယို ဂူတာရက်စ်က အပါအဝင် နိုင်ငံတကာအဖွဲ့အစည်းများ၊ အမျိုးသားညီညွတ်ရေးအစိုးရနှင့် ပြည်တွင်း/ပြည်ပ အဖွဲ့အစည်းများကလည်း ကန့်ကွက်ရှုတ်ချကြောင်း ထုတ်ပြန်ထားကြသည်။

.