မြန်မာနိုင်ငံတွင် တစ်နှစ်ခွဲကျော်အတွင်း စစ်ဘေးဒုက္ခသည် ၈ သိန်း ၆ သောင်းကျော် ရှိလာ ဟု UN OCHA ထုတ်ပြန်

.

စစ်ကောင်စီ အာဏာသိမ်းပြီး တစ်နှစ်ခွဲကျော် ကာလအတွင်း စစ်ဘေးဒုက္ခသည် ၈၆၆၄၀၀ ရှိလာပြီ ဖြစ်ကြောင်း ကုလသမဂ္ဂ လူသားချင်းစာနာမှုဆိုင်ရာ ပေါင်းစပ်ညှိနှိုင်းရေးရုံး (UN OCHA) က ယမန်နေ့ ဇူလိုင်လ ၃၁ ရက်တွင် ထုတ်ပြန်ထားသည်။

.

ဓါတ်ပုံ - ဆီဆိုင်မြို့နယ်အတွင်းရှိ စစ်ဘေးရှောင်စခန်းတစ်ခု

.

အဆိုပါ စစ်ဘေးဒုက္ခသည် ၈ သိန်းကျော်တွင် စစ်ကိုင်းတိုင်းဒေသကြီးမှ ၄၇၀၀၀၀ ကျော်ဖြင့် အများဆုံး ပါဝင်နေပြီး ကရင်ပြည်နယ်တွင် ၈၂၄၀၀ ကျော်၊ မကွေးတိုင်းတွင် ၇၉၂၀၀၊ ကရင်နီ (ကယား) ပြည်နယ်တွင် ၇၄၅၀၀ ဦး ပါဝင်ကာ ကျန် စစ်ဘေးဒုက္ခသည်များမှာ ကချင်ပြည်နယ်၊ ရှမ်းပြည်နယ်တောင်ပိုင်းနှင့် မြောက်ပိုင်း၊ ပဲခူးတိုင်းအရှေ့ပိုင်း၊ တနင်္သာရီတိုင်းနှင့် မွန်ပြည်နယ်တို့မှ ဖြစ်ကြောင်း UN OCHA က ဖော်ပြထားသည်။

.

အာဏာမသိမ်းမီနှင့် အာဏာသိမ်းပြီးနောက် စစ်ဘေးဒုက္ခသည် စုစုပေါင်း ၁၂ သိန်းကျော်အတွက် အကူအညီများ လိုအပ်လျက်ရှိရာ လက်ရှိတွင် ၁၃ ရာခိုင်နှုန်း၊ အမေရိကန်ဒေါ်လာ ၁၀၆ သန်းဖိုးသာ ထောက်ပံ့ထားနိုင်သည်ဟု သိရသည်။

.

ထို့အပြင် အာဏာသိမ်းပြီးနောက် လူပေါင်း ၁ ဒသမ ၆ သန်း အလုပ်လက်မဲ့ဖြစ်ခဲ့ရပြီး ငွေကြေးဖောင်းပွမှု ၁၈ ရာခိုင်နှုန်း အထိ ရောက်ရှိခဲ့ကြောင်း ကမ္ဘာ့ဘဏ်ကို ကိုးကား၍ UN OCHA က ဖော်ပြထားသည်။

.

.