ဒီးမော့ဆိုမြို့နယ်တွင် စစ်ကောင်စီတပ် ထောင်ထားသည့်မိုင်းများ တွေ့ရှိသဖြင့် အသွားအလာဂရုစိုက်ရန် PDF သတိပေး

.

ကရင်နီ (ကယား) ပြည်နယ်တွင် စစ်ကောင်စီတပ်မှ ထောင်ထားသည့် နင်းမိုင်းများ တွေ့ရှိသည့်အတွက် ဒေသခံများ အသွားအလာ ဂရုစိုက်ကြရန် ဒီးမော့ဆိုမြို့နယ်ပြည်သူ့ကာကွယ်ရေးတပ်ဖွဲ့ (DMO PDF) က သတိပေးထားသည်ဟု သိရသည်။

.

.

ထူလွှီဘီလာနှင့် ငွေတောင်ရွာသစ်ကျေးရွာများကို ယမန်နေ့ ဩဂုတ်လ ၂၆ ရက်က နယ်မြေရှင်းလင်းမှုများ ပြုလုပ်စဉ် ယင်း နင်းမိုင်းများကို တူးဖော်တွေ့ရှိခဲ့ခြင်းဖြစ်သည်ဟု သိရသည်။

.

DMO PDF စစ်ကြောင်းမှ ဖြတ်သန်းသွားလာနေစဉ် မသင်္ကာဖွယ်ရာ တွေ့ရှိသည့်အတွက် စစ်ဆေးရာ စစ်ကောင်စီတပ် ထောင်ထားသည့် မိုင်းများကို တွေ့ရှိခဲ့ရပြီး စစ်ကောင်စီတပ်နှင့် နီးကပ်နေသည့်အတွက် နင်းမိုင်း ၂ လုံးကိုသာ ဖြုတ်ယူ နိုင်ခဲ့သည်ဟု DMO PDF မှ တာဝန်ရှိသူတစ်ဦးက ပြောဆိုခဲ့သည်။

.

ထို့အပြင် သီးခြားလမ်းကြောင်းတစ်ခု၌ နွားတစ်ကောင် မိုင်းနင်းမိပြီး ပေါက်ကွဲမှု ဖြစ်ပွားခဲ့ကြောင်းလည်း သိရသည်။

.

စစ်ကောင်စီတပ်သည် အင်အား ၂၀၀ ခန့်ဖြင့် ဩဂုတ်လ ၂၀ ရက်မှ စတင်ကာ ဒီးမော့ဆိုမြို့နယ်၊ သဲတောင်၊ ခြေတော်ရာဘုရားနှင့် ဖရူဆိုမြို့နယ်၊ ငွေတောင်ရွာသစ် ကျေးရွာများတွင် စစ်ကြောင်းဖြန့်ကျက်ထားပြီး ယခုအခါ ကဒါးလားတောင်၊ ထီးတော်ကူး၊ ထီးပေါ်ဆို စသည့်နေရာများကို တပ်ဖြန့်ထားကြောင်း သိရသည်။

.