သမိုင်းတွင် တစ်ကြိမ်တစ်ခါမျှ မကြုံဖူးသည့် စည်းလုံးညီညွတ်မှုမျိုး ရရှိနေပြီဟု NUG ယာယီသမ္မတ ပြော

.

မြန်မာ့သမိုင်းတွင် တစ်ကြိမ်တစ်ခါမျှ မကြုံဖူးသည့် စည်းလုံးညီညွတ်မှုမျိုး ရရှိနေပြီဖြစ်ကြောင်း၊ တိုင်းရင်းသား ပြည်သူလူထုနှင့် တိုင်းရင်းသားလက်နက်ကိုင်အင်အားစုများက အာဏာရှင်ကို တွန်းလှန်တိုက်ဖျက်ရန် မယုံနိုင် လောက်အောင် ပူးပေါင်းဆောင်ရွက်မှုများရှိနေပြီ ဖြစ်ကြောင်း အမျိုးသားညီညွတ်ရေး အစိုးရ (NUG) ယာယီသမ္မတ ဒူဝါလရှီးလက ပြောဆိုခဲ့သည်ဟု သိရသည်။

.

.

အမျိုးသားဒီမိုကရေစီအဖွဲ့ချုပ်ပါတီမှ ကျင်းပသော ၃၄ နှစ်မြောက် ရှစ်လေးလုံးအရေးတော်ပုံနေ့ အခမ်းအနားသို့ တက်ရောက်စဉ် ယာယီသမ္မတက ယင်းကဲ့သို့ ပြောဆိုခဲ့ခြင်းဖြစ်သည်။

.

“အချင်းချင်း အကြားယုံကြည်မှုများပိုမိုတိုးတက်လာပြီဖြစ်ပါတယ်။ အဲဒီရရှိထားတဲ့ စည်းလုံးညီညွတ်မှုအားနဲ့ ရှစ်လေးလုံး သမိုင်းဝင်နေ့ထူးနေ့မြတ်မှာ စစ်တပ်နဲ့ အာဏာရှင်မှန်သမျှကို တွန်းလှန်ဖြိုခွင်းပြီး စစ်မှန်တရားမျှတတဲ့၊ စစ်မက်မရှိတော့တဲ့၊ တိုးတက်ထွန်းကားတဲ့ ဖက်ဒရယ်ပြည်ထောင်စု ကြီးကို တည်ဆောက်သွားကြပါစို့”ဟု ယာယီသမ္မတဒူဝါလရှီးလက တိုက်တွန်းသည်။

.

ထို့အတူ NUG ပြည်ထောင်စုဝန်ကြီးချုပ် မန်းဝင်းခိုင်သန်း ကလည်း အကြမ်းဖက် ရမ်းကားသောနည်းလမ်းများဖြင့် ပြည်သူကို သတ်ဖြတ်နှိပ်စက်ပြီး အာဏာရှင်လူတစ်စု ကောင်းစားရေးအတွက် တိုင်းပြည်ကို အဓမ္မ အုပ်ချုပ်ရန် စိတ်ကူးယဉ်နေပါက ယခုထက် အဆမတန် ကြီးမားသည့် ပြည့်သူ့သစ္စာ စူးကာ အမြစ်ပြတ်ချေမှုန်းမှုကို မကြာခင် ခံရတော့မည်ဖြစ်ကြောင်း ပြောဆိုခဲ့သည်။

.

“အခုနှစ်မှာတော့ တော်လှန်ရေးစိတ်ဟာ လူထုလူတန်းစားအားလုံးရင်ထဲ ပိုမို ကိန်းဝပ်နေပြီး ပြည်သူ့အောင်ပွဲမှတစ်ပါး အခြားမရှိဆိုတဲ့ စိတ်ဓာတ်နဲ့ ရှေ့ဆက်နေကြတဲ့ အချိန်ကာလဖြစ်ပါတယ်။ ၁၉၈၈ လူထုတော် လှန်ရေးက ပုခုံးထမ်း တင်ပေးလိုက်တဲ့ ယခုနွေဦးတော် လှန်ရေးဟာ စစ်အာဏာရှင်တွေ နိဂုံးချုပ်ပြီး ပြည်သူ့အောင်ပွဲဆီသို့ အလွန်ပင်နီးကပ် နေပြီဖြစ်ပါတယ်” ဟု ပြည်ထောင်စုဝန်ကြီးချုပ်က ပြောသည်။

.

ပြည်ထောင်စုလွှတ်တော် ကိုယ်စားပြုကော်မတီ (CRPH) ဥက္ကဋ္ဌ ဦးအောင်ကြည်ညွန့် ကလည်း ယခု နွေဦး တော်လှန်ရေးတွင် ခေတ်အဆက်ဆက် တိုင်းပြည်ကို ဖျက်ဆီးခဲ့သော စစ်အာဏာရှင်များနှင့် အပေါင်းအပါများကို အမြစ်ဖြတ်ရမည့် နောက်ဆုံးတိုက်ပွဲအဖြစ် ကြိုးပမ်းသွားရမည်ဖြစ်ကြောင်း တိုက်တွန်းပြောဆိုခဲ့သည်။

.