​​​​တောင်ကြီးမြို့ပေါ်ရှိ ဖြူနီကြားနေရာများတွင် ရပ်နားသည့်ယာဉ်များကို ဖမ်းဆီးနေသည့်အတွက် ဈေးဆိုင်ခန်းများနှင့် ဈေးဝယ်သူများ အခက်ကြုံ

.

တောင်ကြီးမြို့ပေါ်ရှိ ဗိုလ်ချုပ်အောင်ဆန်းလမ်းမ အပါအဝင် လမ်းဘေး ဖြူနီကြား နေရာများတွင် ရပ်နားသည့် ယာဉ်များကို စစ်ကောင်စီ၏ ယာဉ်ထိန်းရဲများက လိုက်လံဖမ်းဆီးနေသည့်အတွက် လမ်းမဘေးရှိ ဈေးဆိုင်ခန်းရှင် များနှင့် ဈေးဝယ်သူ ပြည်သူလူထုများအတွက် အခက်အခဲ ဖြစ်ပေါ်နေရကြောင်း သိရသည်။

.

.

“ကား၊ ဆိုင်ကယ် လိုင်စင်စစ်တယ်၊ ဖမ်းတယ်။ အခုတစ်ခါ ဖြူနီကြားရပ်ရင် ဖမ်းတယ်။ အမျိုးမျိုးကို လုပ်စားနေကြ တာပါ။ မိန်းလမ်းတစ်လျှောက်လုံးက ဖြူနီကြားတွေချည်းပဲ။ အဲဒီလိုမှ ရပ်လို့မရရင် အဲဒီလမ်းဘေးက ဈေးဆိုင်ခန်းတွေ ဘယ်လိုဈေးရောင်းရတော့မလဲ။ ဝယ်တဲ့သူလည်း လာဝယ်လို့မရ၊ ရောင်းတဲ့သူလည်း ရောင်းလို့မရ၊ အားလုံးဒုက္ခ ရောက်အောင် နည်းအမျိုးမျိုးနဲ့ လုပ်နေကြတာပါ” ဟု တောင်ကြီးဒေသခံတစ်ဦးက ပြောသည်။

.

ယင်းကဲ့သို့ ဖြူနီကြားနေရာတွင် ရပ်နားသည့်ယာဉ်များအား ဖမ်းဆီးမှုကို ဩဂုတ်လ ၂၂ ရက်မှ စတင်၍ ဆောင်ရွက် နေခြင်းဖြစ်ပြီး စစ်ကောင်စီလက်အောက်ခံ ရဲ၊ ယာဉ်ထိန်းရဲ၊ စည်ပင်နှင့် ဌာနဆိုင်ရာများက ပူးပေါင်းလုပ်ဆောင်နေခြင်း ဖြစ်ကြောင်း သိရသည်။

.

တောင်ကြီးမြို့ပေါ်တွင် ဖြူနီကြား အမှတ်အသားပါရှိသော ကပ်တုံးနှင့် တိုင်နေရာများတွင် ယာဉ်ရပ်နားခြင်းမပြုရန် စစ်ကောင်စီ၏ ယာဉ်ထိန်းရဲတပ်ဖွဲ့က တားမြစ်ထားပြီး ယင်း‌နေရာများတွင် မော်တော်ယာဉ်အား အချိန်ကြာမြင့်စွာ ရပ်နားထားပါက ယာဉ်အား ကရိန်ဖြင့် သယ်ဆောင်သိမ်းဆည်းမည့်အပြင် ကုန်ကျစရိတ်ကို ယာဉ်ပိုင်ရှင်မှ ကျခံရမည် ဖြစ်ကာ အပျက်အစီးအတွက် တာဝန်ယူမည်မဟုတ်ကြောင်း ကြေညာထားသည်။

.

တောင်ကြီးမြို့၊ ဗိုလ်ချုပ်အောင်ဆန်းလမ်းမတစ်လျှောက်တွင် မီနီမားကက်များ၊ လူသုံးကုန်ပစ္စည်းရောင်းချသည့် ဈေးဆိုင်များ အများဆုံး တည်ရှိနေပြီး ယခုကဲ့သို့ ဖြူနီကြား သတ်မှတ်ထားသည့်အတွက် ဈေးရောင်းချသူများနှင့် ဈေးဝယ်သူ ပြည်သူလူထုများ အခက်အခဲဖြစ်ပေါ်လျက်ရှိကြောင်း သိရသည်။

.