.
အရပ်သားအစိုးရ ကြိုးပမ်းခဲ့သည့်
နျူကလီးယားဖျက်သိမ်းရေးကို စစ်ကောင်စီတပ်က ဖျက်ဆီးခြင်း မပြုနိုင်ရေး စောင့်ကြည့်ပေးရန်
နိုင်ငံတကာကို ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ် သံအမတ်ကြီး ဦးကျော်မိုးထွန်း
က တိုက်တွန်းပြောဆိုခဲ့သည်ဟု သိရသည်။
.
ကုလသမဂ္ဂဌာနချုပ်တွင်
ဩဂုတ်လ ၁ ရက်မှ ၂၆ ရက်အထိ ကျင်းပလျက်ရှိသော နျူကလီးယားလက်နက် မပြန့်ပွား ရေး စာချုပ်အဖွဲ့ဝင်နိုင်ငံများ၏
လုပ်ဆောင်မှုများ ပြန်လည်သုံးသပ်ရေးဆိုင်ရာ (၁၀) ကြိမ်မြောက် ညီလာခံတွင် ဦးကျော်မိုးထွန်းက
ယင်းကဲ့သို့ ပြောဆိုခဲ့ခြင်းဖြစ်သည်။
.
စစ်တပ်အာဏာသိမ်းမှုကြောင့်
အရပ်သားအစိုးရ၏ TPNW တွင်
အတည်ပြု ပါဝင်ရေး ကြိုးပမ်းမှုများသည် ထိခိုက်ခဲ့ရ ကြောင်း၊ နျူကလီးယားဖျက်သိမ်းရေးနှင့်
ပတ်သက်ပြီး ယခင်အရပ်သားအစိုးရ၏ ကြိုးပမ်းဆောင်ရွက်ခဲ့မှုများကို ဖျက်ဆီးခြင်း မပြုနိုင်ရန်အတွက်
တရားမဝင်စစ်တပ်ကို နိုင်ငံတကာအသိုင်းအဝိုင်းက စောင့်ကြည့်ပေးရန် ဦးကျော်မိုးထွန်းက
တိုက်တွန်းပြောဆိုခဲ့သည်။
.
ထို့အပြင် ကုလသမဂ္ဂအထွေထွေညီလာခံနှင့်
လူ့အခွင့်အရေးကောင်စီ၏ တိုက်တွန်းချက်အတိုင်း မြန်မာစစ်တပ်ကို လက်နက်ရောင်းချပေးနေသည့်
နိုင်ငံများအနေဖြင့် လက်နက်တင်ပို့ရောင်းချမှုကို ရပ်တန့်ပေးရန် တောင်းဆိုကြောင်း၊
မြန်မာနိုင်ငံအနေဖြင့် နျူကလီးယားလက်နက် ဖျက်သိမ်းရေးနှင့် မပြန့်ပွားရေးဆိုင်ရာ ကတိကဝတ်များကို
ဆက်လက် အပြည့်အဝ လိုက်နာသွားမည်ဖြစ်ပြီး နျူကလီးယားအသုံးပြု တိုက်ခိုက်ခြင်းကို ရှုတ်ချကြောင်း
၎င်းက ဆက်လက် ပြောဆိုခဲ့သည်။
.
မြန်မာနိုင်ငံတွင်
လွန်ခဲ့သည့် ၅ နှစ် အရပ်သားအစိုးရလက်ထက်အတွင်း စစ်တပ်က ၎င်းတို့၏ လုပ်ဆောင်ချက်များနှင့်
ပတ်သက်၍ ပွင့်လင်းမြင်သာမှု မရှိခဲ့သော်လည်း အရပ်သားအစိုးရ အနေဖြင့် နျူကလီးယားလက်နက်
ဖျက်သိမ်းရေးကို အဓိကဦးစားပေး လုပ်ငန်းအဖြစ် တက်ကြွစွာ ပါဝင်ဆောင်ရွက်ခဲ့ကြောင်း
ဦးကျော်မိုးထွန်းက ပြောသည်။
.
မြန်မာနိုင်ငံအနေဖြင့်
Convention on Nuclear Safety နှင့် Convention on the Physical Protection of Nuclear Materials
ကို ၂၀၁၆ ခုနှစ်နှင့် CTBT ကို ၂၀၁၇ ခုနှစ်တွင်
လည်းကောင်း၊ TPNW ကို ၂၀၁၈ ခုနှစ်တွင်လည်းကောင်း ပါဝင်လက်မှတ်ရေးထိုးနိုင်ခဲ့ကြောင်း
သိရသည်။
.
