တောင်ကြီး အထွက်တွင် ယာဉ်မောင်းလိုင်စင် စစ်ဆေးကာ မပါသူများကို ၃၀၀၀၀ ကျပ် ဒဏ်ရိုက်

.

တောင်ကြီးမြို့မှ ဟိုပုံးမြို့သို့ အထွက်တွင် ဖြတ်သန်းသွားလာနေသော မော်တော်ယာဉ်များကို စစ်ကောင်စီ လက်အောက်ခံ အဖွဲ့များက ယနေ့ ဩဂုတ်လ ၂၉ ရက်၌ ယာဉ်မောင်းလိုင်စင် စစ်ဆေးကာ မပါသူများကို ငွေကျပ် ၃၀၀၀၀ ဒဏ်ရိုက်ခဲ့ကြောင်း သိရသည်။

.

.

“ယာဉ်ထိန်းတွေ၊ ရဲရောပါတယ်။ အရင် ရက်တွေက မရှိဘူး၊ ဒီနေ့မှ စစ်တာ။ နောက်ရက်တွေလည်း စစ်တော့မယ် ထင်တယ်” ဟု ယာဉ်မောင်း တစ်ဦးက ပြောသည်။

.

မြို့အထွက် တောင်ကြီးစီးပွားရေးစင်တာ အနီးတွင် စစ်ဆေးနေခြင်း ဖြစ်ကာ စစ်ဆေးမှုကြောင့် ယာဉ်ကြော ကြပ်တည်းမှုများလည်း ဖြစ်ပေါ်ခဲ့ပြီး ဒဏ်ငွေ ဆောင်ရသည့် မော်တော်ယာဉ် အများအပြားကို တွေ့ရှိခဲ့ရကြောင်း ၎င်းက ဆက်လက် ပြောဆိုခဲ့သည်။

.

ယင်းကဲ့သို့ ယာဉ်မောင်းလိုင်စင် စစ်ဆေး၍ ဒဏ်ရိုက်သည်ဟုဆိုကာ ငွေတောင်းခံမှုအပေါ်  ပြည်သူများနှင့် မော်တော်ယာဉ် မောင်းသူများက ဝေဖန်မှုများ ရှိနေကာ ယာဉ်ထိန်းရုံးမှ အမည် မဖော်လိုသူ ရဲအရာရှိကမူ ယာဉ်စည်းကမ်း၊ လမ်းစည်းကမ်းအရ လုပ်ဆောင်ခြင်း ဖြစ်သည်ဟု တုံ့ပြန်ပြောဆိုခဲ့သည်။

.