.
တောင်ကြီးမြို့၊ အနောက်မြို့ပတ်လမ်း၏
ဝါးပြားလမ်းဆုံနေရာမှ တောင်ကြီးတက္ကသိုလ်အနီး၊ ဧရာဝတီလက်ဖက်ရည် ဆိုင် လမ်းဆုံအထိ လမ်းပိုင်းဖြစ်သော
အပိုင်း (၃) မှာ ဆက်လက်ပြုပြင်နိုင်ခြင်းမရှိသည့်အတွက် ဆိုးရွားစွာ ပျက်စီးနေပြီး လမ်းသွား
လမ်းလာများအတွက် အခက်အခဲဖြစ်ပေါ်နေရကြောင်း သိရသည်။
.
အဆိုပါ အနောက်မြို့ပတ်လမ်းကို
အရပ်သားအစိုးရလက်ထက်တွင် အပိုင်း ၃ ပိုင်းခွဲ၍ ဘဏ္ဍာရေးနှစ်အလိုက် ပြုပြင် နေခြင်းဖြစ်ပြီး
အပိုင်း (၁) နှင့် အပိုင်း (၂) မှာ ဆောင်ရွက်ပြီးဖြစ်သော်လည်း စစ်ကောင်စီ အာဏာသိမ်းပြီးနောက်
အပိုင်း (၃) ဖြစ်သော ဝါးပြားလမ်းဆုံမှ ဧရာဝတီလမ်းဆုံအထိ လမ်းပိုင်းကို ဆက်လက်ပြုပြင်နိုင်ခြင်း
မရှိသေးဘဲ ကြန့်ကြာနေခြင်းဖြစ်ကြောင်း သိရသည်။
.
“လမ်းက မုန့်လင်မယားဒယ်လိုပါပဲ။
အခုတော့ လိုက်ဖာနေတာ တွေ့ရတယ်။ ဖာတစ်ရာလမ်းပေါ့။ လမ်းသွားလမ်းလာ အထူးသဖြင့် ဆိုင်ကယ်တွေအတွက်
အန္တရာယ်များပါတယ်” ဟု တောင်ကြီးဒေသခံတစ်ဦးက ပြောသည်။
.
ယင်း အနောက်မြို့ပတ်လမ်း၏
ကျန်လမ်းပိုင်းကို ပြင်ဆင်ခြင်းမရှိသည့်အတွက် ကုန်တင်ယာဉ်များ၊ တွဲယာဉ်များ ဖြတ်သန်းသွားလာချိန်တွင်
ယာဉ်ကြောပိတ်ဆို့မှုများ မကြာခဏ ဖြစ်ပေါ်တတ်ပြီး ယာဉ်တိုက်မှုအန္တရာယ် ဖြစ်ပွား မည်ကို
စိုးရိမ်နေရကြောင်း သိရသည်။
.
“တကယ်ဆိုရင် စစ်ကောင်စီသာ
အာဏာမသိမ်းခဲ့ရင် ဒီလမ်းက လုပ်ပြီးလောက်ပါပြီ။ ဒီကောင်တွေနဲ့ကျမှ ဘာမှ အလုပ်မဖြစ်ဘူး။
လမ်းဖာတာ လောက်နဲ့ကတော့ ဘယ်လိုမှ သွားလာရတာ အဆင်မပြေပါဘူး” ဟု အခြား ဒေသခံ တစ်ဦးကလည်း
ပြောဆိုခဲ့သည်။
.
တောင်ကြီးမြို့၊ အနောက်မြို့ပတ်လမ်းသည်
ကုန်တင်ယာဉ်နှင့် တွဲယာဉ်ကြီးများသွားလာသည့်လမ်း ဖြစ်သည့်အပြင် မြို့ပေါ်နေ ပြည်သူများ
အများဆုံး အသုံးပြုသွားလာနေသည့် လမ်းဖြစ်သည့်အတွက် ယာဉ်ကြောရှုပ်ထွေးသော လမ်းမ တစ်ခုလည်း
ဖြစ်သည်။
.
